Siriia premer-ministrınıŋ mındetın atqaruşy Mūhammed äl-Başir elde uaqytşa ükımettıŋ qūramy jasaqtalǧanyn mälımdedı, dep habarlaidy "Adyrna" ūlttyq portaly RİA Novosti aqparat agenttıgıne sılteme jasap.
"Uaqytşa ükımet qūryldy, ol "Qūtqaru ükımetınıŋ" bırneşe ministrınen tūrady. Būl ükımet 2025 jyldyŋ nauryzyna deiın, konstitusiialyq mäseleler şeşılgenge deiın qyzmet atqarady", – dedı ol.
Būǧan deiın, seisenbı künı, äl-Başir özın ükımet basşysy qyzmetıne taǧaiyndau turaly mälımdegen edı
Onyŋ aituynşa, ükımettıŋ mındetterı – qauıpsızdıktı qamtamasyz etu jäne memlekettık instituttardyŋ tūraqtylyǧyn saqtau, eldıŋ ydyrauyna jol bermeu jäne jaŋa kabinet qūrylǧanǧa deiın azamattarǧa qyzmet körsetu.
Äl-Başir būrynǧy ükımet ministrlerınıŋ kömegıne ümıt artatynyn atap ötıp, ükımet aldynda köptegen synaqtar tūrǧanyn aitty.
'Qūtqaru ükımetı' qaruly oppozisiia tarapynan qūrylǧan. Onyŋ bilıgı İdlib provinsiiasy men Aleppo provinsiiasynyŋ soltüstıgındegı qaruly toptar baqylauyndaǧy aumaqtarǧa taralǧan. Al resmi Siriia ükımetın premer-ministr Mūhammed Ǧazi äl-Djaliali basqarǧan.
Damask qaruly oppozisiianyŋ baqylauyna ötkennen keiın äl-Djaliali bırneşe ministrmen elde qalatynyn jäne qaruly oppozisiia basşylyǧymen bailanys ornatqanyn mälımdedı.
Aldyn ala Siriiada bilıkke kelgen toptardyŋ ökılderı bilıktı tapsyru jäne anarhiianyŋ aldyn alu mäselelerın talqylaǧan. Ūsynylǧan qadamdardyŋ ışınde barlyq äskeri toptardy taratyp, olardy äskeri operasiialardy basqaru basqarmasynyŋ qolastyna bırıktıru turaly ūsynys aitylǧan.
Eske sala keteiık, Başar Asad Siriiadan qaşyp ketken edı. Resei Syrtqy ıster ministrlıgınıŋ mälımetınşe, Prezident Başar Asad keibır qaqtyǧysqa qatysuşylarmen kelıssözder jürgızıp, öz qyzmetınen ketu jäne respublikany tastap şyǧu turaly şeşım qabyldaǧan. Būl kelıssözderge Mäskeu qatyspaǧan.
Keiınırek Kremldegı derekköz RİA Novosti agenttıgıne Asadtyŋ otbasy müşelerımen bırge Resei astanasyna kelgenın, gumanitarlyq sebepterge bailanysty olarǧa baspana berılgenın habarlady.
Basqa materialdar
Adyrna.kz ūlttyq portalynyŋ maŋyzdy aqparattaryna jazylu
Soŋǧy jaŋalyqtar turaly habardar bolyŋyz