Täuelsızdık künı qarsaŋynda Almaty oblysynyŋ Raiymbek audanynda jastar üşın arnaiy boi kötergen kovorking ortalyq qoldanysqa berıldı.
Būl audan halqynyŋ üşten bırın qūraityn Raiymbek jastary üşın köpten kütken quanyşty oqiǧa boldy. Zamanaui nysan jastardyŋ jan-jaqty damuyna, bos uaqytyn tiımdı ötkızuıne, qajettı aqparat aluyna mümkındık beretın ortalyqqa ainalmaq.
Sondai-aq, jastarǧa bılıktı mamandar psihologiialyq jäne zaŋgerlık kömek, qarjylyq sauattylyq boiynşa keŋes berıp, jūmysqa ornalasuyna qoldau körsetedı.
Aita ketu kerek, jastar ortalyqtary jyl basynan berı oblys äkımınıŋ qoldauymen Qonaev qalasynda jäne Balqaş, Kegen audanynda ıske qosyldy, keler jyly Qaskeleŋ qalasynda aşylady.
«Qazır Almaty oblysynda 14 pen 35 jas aralyǧyndaǧy 420 myŋnan astam jas tūrady. Bıraq jastar üşın bas qosyp oi bölısetın, qiyn kezde kömek körsetetın ortalyq oblys aimaǧynda bolǧan emes. Bız qazır būl mäselenı jüielı jäne kezeŋ-kezeŋımen şeşıp jatyrmyz. Aldaǧy uaqytta bız oblystyŋ basqa audandarynda jastar üşın zamanaui infraqūrylym qūruǧa tyrysamyz. Būl öz kezegınde jastarmen jüielı jūmys jürgızuge yqpal etedı», - dedı oblystyq jastar saiasaty mäselelerı jönındegı basqarma basşysy Mädi Ahmetov.
Kovorking ortalyqtar öŋırdegı jastardy äleumettendırudıŋ maŋyzdy qūralyna ainalyp keledı. Jastardyŋ jaŋa alaŋynda tegın negızde biznes-treningter, şeberlık sabaqtary, kezdesuler, körmeler, üiırmeler jäne basqa da ıs-şaralar ötkızu josparlanuda.
