Ükımet basşysy Asqar Maminge Jambyl oblysynyŋ äkımı Asqar Myrzahmetov jobanyŋ jai-japsary, jüzege asyrylu barysy men daiyndyǧy turaly jan-jaqty baiandady.
Aşyǧyn aitu kerek, auyldy jerdegı halyqty jappai jūmyspen qamtudyŋ bırden bır joly – ol qosalqy şaruaşylyqqa qoldau körsetıp, damytu. Osy oraida būǧan deiın habarlaǧanymyzdai oblys äkımınıŋ özı bastaǧan jūmysşy top öŋırdegı barlyq audan, auyldyq eldımekenderge arnaiy baryp, 138 myŋ aula tolyq zerdelengen bolatyn.
«Taldau nätijesı körsetkendei, salystyrmaly türde tūrǧyndar qosalqy şaruaşylyqty tiımdı tabys közıne ainaldyra almai otyr. Sebep – tiıstı ūiymdastyru jūmystarynyŋ tömendıgı. Osy tūrǧyda zerdeleu barysynda tūrǧyndardyŋ ūsynystarymen halyqtyŋ tūrmysyn jaqsartuǧa baǧyttalǧan 5 baǧyt qarastyrylyp otyr. Olar: üi ırgesındegı jäne auyl syrtyndaǧy (pailyq) jerlerdı tiımdı paidalanu, üi aulasynda mal jäne qūs önımdılıgın arttyru, qosalqy şaruaşylyqtardy jemıstı jürgızuge qolbailau-mäselelerdı kooperativter arqyly şeşu jäne auyldaǧy şaǧyn jobalardy qarjylandyru. Būl 5 baǧyt boiynşa jalpy qūny 46,4 milliard teŋge kölemınde 31 myŋnan astam jobany ıske asyru mümkınşılıgı anyqtalyp otyr. Nätijesınde 131 myŋ otbasy nemese 600 myŋnan astam adam aiyna ortaşa eseppen 128 myŋ teŋge kölemınde tūraqty tabyspen qamtylyp, 68 myŋ tūrǧyn özın-özı jūmyspen qamtyǧandar men jūmyssyzdar jeke käsıpkerge ainalady dep kütılude. Sol sekıldı, auyl şaruaşylyǧynyŋ jalpy önımı 34 paiyzǧa ūlǧaiyp, süt pen ettı qaita öŋdeu käsıporyndarynyŋ jüktemesı 30 paiyzǧa artuy eseptelgen», – dedı Asqar İsabekūly.
Äu basta pilottyq jobanyŋ jemıstılıgıne köz jetkızu üşın ärı jūmystyŋ ülgı-bastauy retınde oblystyŋ on auyldyq okrugı taŋdalyp alynyp otyr. Ol – josparly jūmystyŋ alǧaşqy kezeŋı bolmaq. Jambyl oblysynyŋ äkımı Ükımet basşysyna alǧaşqy kezeŋde atqarylar jūmystar turaly aitty.
«On auyldyq okrug boiynşa 7 myŋnan astam aula qamtylady desek, onda 1117 gektar üi ırgesındegı jerler bar. Şara barysynda sol jerlerdı ūtymdy ūqsatudyŋ joldary naqty jüzege aspaq. Bau-baqşalyqtyŋ tiımdılıgın esesleude jylyjailardyŋ, mal şaruaşylyǧyn köterude kooperativterdıŋ maŋyzdylyǧy eskerılgen. Sondai-aq, ol üşın sapaly tūqym, köşet, tyŋaitqyştardy tauyp, jetkızıp beru, tıptı, tapşy tehnika men qajettı mamandarmen qamtu mäselesı de oŋynan tarqatylmaq», – dedı äkım.
Aita keteiık, zerdeleu barysynda mūndaǧy är auyldyq okrugtyŋ tabiǧaty, jerı, suy eskerılgen. Naqty nätijede önımdılıktıŋ 2-4 ese ösımıne qol jetkızu josparlanǧan. Pilottyq auyldyq okrugterde qosalqy şaruaşylyqtan bölek 137 şaǧyn jobalardyŋ tızımı jasaqtalyp, jüzege asyrudyŋ jol-jobasy bekıtılgen.
Öŋır basşysy jobany qarjylandyru şarasy äkımdıkke kredit beru jüiesımen «Eŋbek» baǧdarlamasy aiasynda ıske asyru ūsynylatynyn aityp, äkımdık, ary qarai senım Agentı arqyly 2,5 paiyzdyq nesie retınde tūrǧyndardy, kooperativterdı qarjylandyratynyn jetkızdı. Bügınde nesie aluşylardyŋ alǧaşqy bazasy tüzılıp ülgerılgen.
Jalpy, on auyldyq okrug boiynşa jobalardyŋ ıske asuymen 7 myŋ otbasy nemese 35 myŋ adam kelesı jyldyŋ qorytyndysymen aiyna kemınde 104 myŋ teŋge (ösım 2,5 ese) tabyspen qamtamasyz etıledı dep kütılude. 2229 özın-özı jūmyspen qamtyǧandar men jūmyssyzdar mındettı zeinetaqy, salyq jäne basqa da tölemderdı töleitın käsıpkerlerge ainalmaq.
«Bız Jobany ıske asyruǧa daiynbyz. Äkımdıkke qatysty barlyq ūiymdastyru pysyqtalǧan. Sonyŋ ışınde biudjettık äkımşı bolatyn auyl şaruaşylyq basqarmasynyŋ ştattyq sany 18 qyzmetkerge köbeitıldı. Audan, auyl äkımderınıŋ arnaiy jūmys algoritımı bekıtıldı, tiıstı jūmys toptary qūryldy jäne jauapty mamandar oqytyldy. Pilottyq auyl okrugterınde bırneşe kezdesuler ötkızılıp, kooperativ töraǧalary anyqtaldy», – dedı basşysy Asqar Myrzahmetov.
Öz kezegınde Premer-Ministr Asqar Mamin būl jobanyŋ maŋyzdylyǧyn atap ötıp, qoldaitynyn bıldırıp, tiıstı şeşımderdıŋ der kezınde räsımdeluın nazarǧa alatynyn jetkızdı. Jauapty tūlǧalarǧa pilottyq jobanyŋ mehanizımın ūiymdastyrudy tapsyrdy. Pilottyq joba Jambyl oblysyndy nätijelı jüzege assa, basqa öŋırlerge de engızu barysy aityldy.
«ADYRNA»
ūlttyq portaly
