Bügınde auyldy jerlerge mūǧalımder baryp, jūmys ıstegesı kelmeidı. Öitkenı jastar eşqandai jaǧdai jasalmaǧan şalǧaidaǧy auyldan qaraǧanda qalada tūrǧandy qoş köredı. Osy mäselenı şeşu üşın Ükımet «Diplommen auylǧa» baǧdarlamasyn jüzege asyrǧan bolatyn.
Jambyl oblysynda osy jyldyŋ basynan berı «Diplommen auylǧa» baǧdarlamasy aiasynda 201 maman auyldyq jerlerge jūmysqa ornalasyp, öz ornyn tapty. Oblystyq ekonomika jäne biudjettık josparlau basqarmasynyŋ basşysy Güldana Jauynbekovanyŋ aituynşa, baǧdarlamanyŋ paidasy zor. Sondai-aq baǧdarlamamen auylǧa barǧandardyŋ basym köpşılıgı bılım jäne densaulyq saqtau salasynda eŋbek etıp jürgenın tılge tiek ettı. Naqtyraq aitsaq, memlekettık jobaǧa qatysuşylarynyŋ 121-ı bılım, 55-ı densaulyq saqtau, 30-y auyl şaruaşylyǧy jäne 5 maman mädeniet pen sport salasyna tartylǧan.
«Jalpy joba joba bastalǧaly berı oblysta 1700-dei maman auyldarǧa barǧan. Alaida öŋırde mūǧalımder men därıgerler älı de tapşy. Äsırese Qordai, Şu, Baizaq jäne Jambyl audandarynda būl mäsele ötkır sezılıp otyr. Jalpy biyl 256 jas mamanǧa jeŋıldetılgen nesie beru josparlanǧan. Taǧy 277 adam auyldy eldı mekenderde jūmys ısteuge ötınış bergen. Sondai-aq oblysymyzda bügıngı künı 227 mamanǧa taǧy da mamandardyŋ tarapynan qajettılık kelıp tüstı. Ol 1 milliardqa juyq nesie alu boiynşa. Endı bızde bölınetın 5,2 milliard teŋge kölemıne oblystyŋ qajettılıgıne ūsynys jasadyq. Naqtylau barysynda būl qarjydan özımızdıŋ ülesımızdı alatyn bolamyz. Alaida, baǧdarlamada naqty osyndai mamandyqqa basymdyq berılsın degen nūsqama joq. Kezek boiynşa mamandar eldı mekenge kelıp özınıŋ ötınımın beredı. Sol kezekke säikes onyŋ ötınımı qarastyrylady. Būl mäsele deputattarmen de qarastyryluda. Är öŋırde qandai mamanǧa tapşylyq bar, sol boiynşa basymdyqty sol mamandyqqa beru turaly. Bıraq būl özgerıs älı jobaǧa engızılgen joq», – dedı Güldana Jauynbekova.
Aita ketu kerek, biyl «Diplommen auylǧa» baǧdarlamasymen ekı baǧyt boiynşa berıletın äleumettık kömek kölemı artty. Būryn köterme järdemaqy 176 myŋ teŋge bolsa, endı 252 myŋ teŋgege köterıldı. Al 0,01 paiyzben berıletın biudjettık nesie 1500 ailyqtyq eseptık körsetkışke köbeigen.
«ADYRNA»
ūlttyq portaly
