Astanada Muzykalyq jas körermen teatrynda 16 nauryz – Şaŋyraq künıne orai, teatr qabyrǧasynda tanysyp, tabysqan on altynşy jūptyŋ aq nekesı qiyldy. Is-şara ata-babalarymyzda «Şaŋyraq köteru» atty erekşe dästür-saltyn nasihattaudy maqsat tūtyp otyr.
Teatrda bır-bırıne üilenıp otbasyn qūrǧan 15 jūp bar. Al bügıngı «Şaŋyraq künı» teatrda tabysqan 16-jūp Aidos Amandyq pen Aidana Bolattyŋ nekelerın qiiu räsımı öttı.
Atalǧan şaraǧa, qazaq qyzdarynyŋ sūlulyq etalonyna ainalǧan Qyz Jıbegı, Qazaq KSR Eŋbek sıŋırgen artisı, Qūrmet jäne Parasat ordenderınıŋ iegerı Meruert Ötekeşeva, Qazaqstannyŋ eŋbek sıŋırgen qairatkerlerı Qanat pen Sveta Aitbaevtar jäne Astana qalasy, Yryskeldı qajy meşıtınıŋ bas imamy, belgılı dıntanuşy-ǧalym Nūrlan Baijıgıtūly qatysty.
Muzykalyq jas körermen teatrynyŋ direktory, Qazaqstannyŋ eŋbek sıŋırgen qairatkerı Ashat Maksimūly:
-«Keş jaryq, öner süier qauym! Bızdıŋ teatrymyzdyŋ janaşyrlary! Bızdıŋ ūjymymyzda byltyrdan bastap erekşe Nauryznama bastalyp jatyr. Qazaqtyŋ ūlttyq qūndylyqtaryn, ruhani kelbetımızdı paş etetın ülken şaralar ötıp jatyr. Teatrymyz aşylǧaly tört jyl jarymdai uaqyt boldy. Osy aralyqta tek spektaklderdı sahnalau ǧana emes, bızdıŋ teatrymyz ülken şaŋyraqqa ainaldy. Teatrda tek qana 15 otbasy emes, 30 adam bır-bırımen üilesıp, şaŋyraq köterdı.
Bügın otbasyn qūryp, ülken ömır jolyna qol ūstasyp bırge şyqqan qos balamyzǧa sezımnıŋ aqtyǧyn bersın, köŋıldıŋ päktıgın bersın! Ekeuıne öner jolynda da, ömır jolynda da, arman da maqsat ta ortaq bolsyn! Jūptaryŋyz eşqaşan jazylmasyn!»,- dep jastarǧa jürekjardy lebızın arnady.
Şara barysynda neke qiiu räsımımen qatar änder aitylyp, küi tartyldy. Jas otbasyǧa bata berılıp, tılekter aityldy. Otbasylyq qūndylyqtar därıpteldı.
Yryskeldı qajy meşıtınıŋ bas imamy, belgılı dıntanuşy-ǧalym Nūrlan Baijıgıtūly:
- «Adam ata men Haua anadai, Mūhammed paiǧambar men Hadişadai, Han Äbılqaiyr menen Bopai anamyzdai, Täuke han men Sandyq anamyzdai, Jäŋgır han men Bätima anamyzdai, Abylai men Saiman anamyzdai, Qobylandy men Qūrtqa anamyzdai, İsatai men Mylqym anamyzdai, saliqaly ömır berıp, übırlı şübırlı qylyp, tıl-közden saqtap,bır jastyqta qartaiyp Alla taǧala süigen jūptardan boluǧa näsıp etsın! Aumin!»,-dep aqbatasy men bırge mūsylmanşa neke qiiu räsımın jasady.
Al, şaŋyraq köterıp jatqan Aidos Amandyqtyŋ aituynşa, Nauryz merekesınıŋ jaŋa tūjyrymdamasy aiasyndaǧy «Şaŋyraq künı» jalpyūlttyq otbasylyq qūndylyqtar men kırşıksız mahabbat künıne ainalady deuge negız bar.
-«Şaŋyraq künı qazaqstandyqtardyŋ jas ūrpaqty tärbieleu mädenietın körsete otyryp, olardyŋ boiynda patriotizm men adamgerşılıktı qalyptastyruǧa ündeidı. Bügın mūsylmanşa nekemızdı, zaŋdy nekemızdı kielı sahnada Şaŋyraq künınde qiyp jatyrmyz. Bız teatrda tabysqan 16-jūppyz. Būl bız üşın ekı ese baqyt. Aldymyzda üilengen aǧa-äpkelerımız qazır übırlı-şübırlı, berekesı men bırlıgı jarasqan jarasymdy otbasyǧa ainalyp otyr. Aldaǧy uaqytta da osy igı dästür jalǧasady dep oilaimyz», - dedı ol.
Ülken ömırge qadam basqan jūp qalai tanysqandaryn aityp berdı.
-«Osy teatrda 2023 jyldan bastap jūmys ıstep kele jatyrmyz. Jarymnyŋ aty – Aidana Bolat. Universitet qabyrǧasynda tanysqan bolatynbyz. Universitetke talapker bolyp kelıp tūrǧanymyzda tanysyp, dos bolyp kettık. Küläş Baiseiıtova atyndaǧy Qazaq ūlttyq öner universitetınde, Ashat Maemirov şeberhanasynda bırge oqyǧanbyz. Eŋ alǧaş tanysqanda “Miss Kökşetau” ekenın estıp, maǧan qarai ma eken?” dep, batylym jetpedı. 2 jyl dos bolyp, aralasqannan keiın baryp, sezımımdı bıldırıp, qyzym boluǧa ūsynys jasadym, endı, mıne, şaŋyraq kötergelı otyrmyz»,- dedı Aidos.
Märtebelı qonaqtarymyz jastarǧa jürekjardy lebızderın bıldırıp, bır-bırıne degen ıŋkär sezımderı mäŋgılık boluyn, el men jūrttyŋ tek alǧystaryn aluyn, ömır jolynda aspandary aşyq boluyn tıledı.
Qazaq mädenietınde şaŋyraqtyŋ qadır-qasietı airyqşa. Ol – ärı aspan kümbezı, ärı üi-jai, ärı tırek, ärı baquattylyq pen qauıpsızdık jäne ūrpaqtar sabaqtastyǧy.
