Bügın körnektı memleket jäne qoǧam qairatkerı Jūmabek Täşenovtıŋ tuǧanyna 110 jyl toldy. Ol el bırlıgı men tūtastyǧy jolynda aianbai eŋbek etken tūlǧalardyŋ bırı boldy.
Jūmabek Ahmetūly qazaq jerınıŋ bırtūtastyǧyn saqtap qalu jolynda ülken küres jürgızdı. Ol Maŋǧystaudy Türıkmenstanǧa, Soltüstık Qazaqstannyŋ bır bölıgın Reseige, al maqta egetın oŋtüstık audandardy Özbekstanǧa beru turaly ūsynystarǧa qarsy şyqty. Sondai-aq Qazaqstanda iadrolyq synaqtardyŋ jasaluyna qarsylyq bıldırıp, ūlttyq mädeniettı qorǧauǧa atsalysty.
Qairatker şyǧarmaşylyq odaqtarǧa qamqorlyq tanytyp, köptegen öner adamdaryna qoldau körsettı. Onyŋ aralasuymen "Qazaq ädebietı" gazetı jabyludan aman qalyp, "Sosialistık Qazaqstan" (qazırgı "Egemen Qazaqstan") basylymynyŋ audarma gazetke ainaluyna jol berılmedı.
Ūltjandylyǧy üşın keŋestık bilık tarapynan "ūltşyl" degen aiyp taǧylyp, qyzmetınen bosatyldy. 1961 jyldan bastap Şymkent oblysynda türlı lauazymdarda qyzmet etıp, 1975 jyly zeinetke şyqty.
Jūmabek Täşenov 1986 jyly ömırden öttı. Bügınde onyŋ esımı köşelerge berılıp, derektı filmder tüsırılıp, qazaq halqy onyŋ eŋbegın qūrmetpen eske alady.
Basqa materialdar
Adyrna.kz ūlttyq portalynyŋ maŋyzdy aqparattaryna jazylu
Soŋǧy jaŋalyqtar turaly habardar bolyŋyz