Özbekstan prezidentı Şavkat Mirziioevtıŋ töraǧalyǧymen 27 nauryzda ötken keŋeste eldegı atom energetikasyn damytu mäselesı qaraldy. Būl turaly memleket basşysynyŋ baspasöz qyzmetı mälımdedı, dep habarlaidy "Adyrna" ūlttyq portaly.
Jiynda atom energetikasynyŋ bolaşaqta eldegı negızgı elektr energiia közderınıŋ bırı bolatyny atap ötıldı. Sarapşylardyŋ boljamyna säikes, 2035 jylǧa qarai Özbekstandaǧy elektr energiiasyn tūtynu 81,5 mlrd kVtsaǧattan 121 mlrd kVtsaǧatqa deiın ösedı. Būl generasiia közderın ärtaraptandyru qajettılıgın körsetedı.
Özbekstan bilıgı 2030 jylǧa qarai «jasyl» energetikanyŋ ülesın 50%-dan asyrudy josparlap otyr, alaida atom energetikasyn da ūzaq merzımdı şeşım retınde qarastyruda.
Keŋeste ırı atom elektr stansiiasyn (AES) salu mäselesı jan-jaqty qarastyrylyp, tehnikalyq jäne ekonomikalyq aspektıler talqylandy.
Bügınde elde şaǧyn quatty atom elektr stansiiasy (ASMM) jobasy äzırlenude. Sonymen qatar, ırı AES salu boiynşa kelıssözder jürgızılıp jatyr.
2025-2027 jyldarǧa arnalǧan MAGATE-men (Halyqaralyq atom energetika agenttıgı) bırlesken ıs-qimyl jospary äzırlendı. Jobalau men paidalanuǧa beru kezeŋderı MAGATE tarapynan halyqaralyq qauıpsızdık standarttaryna säikes baqylanady. Qarjylandyru közderı, tehnikalyq şeşımder jäne qūrylys alaŋdary talqylanuda.
Keŋeske deiın Özbekstanǧa «Rosatom» memlekettık korporasiiasynyŋ atom energetikasy jönındegı bırınşı vise-prezidentı, «Atomstroieksport» AQ prezidentı Andrei Petrov kelgen bolatyn. Ol «Uzatom» agenttıgınıŋ basşysy Azim Ahmedhadjaevpen bırge şaǧyn jäne ırı AES qūrylysy boiynşa kelıssözder jürgızdı.
27 mamyr 2024 jyly Özbekstan «Rosatommen» şaǧyn atom stansiiasyn jobalau, jabdyqtau jäne salu jönınde kelısımşartqa qol qoidy. Alǧaşqy şaǧyn atom stansiiasy (ASMM) Djizak oblysynyŋ Fariş audanyndaǧy Tuzkan kölınıŋ maŋynda salynady. Mūnda ärqaisysy 55 MVt bolatyn alty reaktor ornatylady, jalpy quaty 330 MVt qūraidy. Qūrylys 2026 jyldyŋ ekınşı toqsanynda bastalady, al alǧaşqy reaktor 2029 jyly ıske qosylady.
Ūqsas jaŋalyqtar
