Özbekstan prezidentı Şavkat Mirziioev öŋırlık joǧary deŋgeidegı konsultativtık kezdesulerdı strategiialyq formatqa – «Ortalyq Aziia qauymdastyǧyna» ainaldyrudy ūsyndy. El basşysynyŋ pıkırınşe, būl bastama memleketaralyq yntymaqtastyqty aitarlyqtai nyǧaitady. Özbekstan liderı būl ūsynysty Taşkentte ötken Ortalyq Aziia elderı basşylarynyŋ jetınşı Konsultativtık kezdesuınde aitty, dep habarlaidy "Adyrna" portaly Özbekstan prezidentınıŋ baspasöz qyzmetıne sıltep.
Öz sözınde Mirziioev bırqatar bastama köterdı. Sonyŋ ışınde:
-
qoǧamdyq bedelı joǧary, ömırlık täjıribesı mol qairatkerlerden Aqsaqaldar keŋesın qūru, būl ūrpaqtar sabaqtastyǧyn nyǧaityp, öŋırlık bıregeilıktı küşeitedı;
-
Ortalyq Aziia elderı arasyndaǧy tauar ainalymyn 1,5–2 ese arttyru maqsatynda sauda-ekonomikalyq jäne investisiialyq yntymaqtastyqty jaŋa deŋgeige şyǧaru;
-
äkımşılık kedergılerdı azaitu, salyq jäne keden räsımderın jeŋıldetu, erkın ekonomikalyq jäne önerkäsıptık aimaqtardy bırlesıp paidalanu.
Mirziioevtıŋ aituynşa, 2035 jylǧa deiıngı sauda-ekonomikalyq özara ıs-qimyldyŋ keşendı öŋırlık baǧdarlamasyn qabyldau aimaqtyq saudanyŋ ösuıne qolaily jaǧdai jasaidy.
Sonymen qatar, öŋırlık investisiialyq klimatty qalyptastyru üşın bıryŋǧai investisiialyq keŋıstık turaly Deklarasiia qabyldau qajettılıgı aityldy. Elektrondyq kommersiiany damytuǧa baǧyttalǧan ortaq baǧdarlama qūryp, virtualdy sauda alaŋdaryn jäne senımdı sifrlyq tölem jüielerın engızu ūsynyldy.
Mirziioev kölık dälızderın, energetikalyq infraqūrylymdy, sonyŋ ışınde elektr stansiialaryn, elektr jelılerın, joldar men şekara ötkelderın jaŋǧyrtu maŋyzdy ekenın atap öttı. Mūndai jobalardy üilestıru üşın premer-ministr orynbasarlary deŋgeiınde İnfraqūrylymdy damytu keŋesın qūru ūsynyldy.
Özbekstan basşysy Auǧanstandy öŋırlık bastamalarǧa integrasiialau mäselesıne de toqtaldy. Ol Amudariia basseinınıŋ su resurstaryn bırlesıp paidalanu jönındegı dialogqa Kabuldy tartu qajettıgın aitty. Su tapşylyǧynyŋ küşeiuın eskere otyryp, Mirziioev 2026–2036 jyldardy Ortalyq Aziiada sudy ūqypty paidalanudyŋ onjyldyǧy dep jariialaudy ūsyndy.
Prezident Taşkenttegı İslam örkenietı ortalyǧy jastardyŋ ǧylymi jäne ruhani ortaǧa tartyluyna yqpal etetın maŋyzdy orynǧa ainalatynyna ümıt bıldırdı. Sondai-aq ǧylymi jobalardy qarjylandyratyn, akademiialyq qauymdastyqty qoldaityn jäne jasandy intellekt tehnologiialaryn damytuǧa mümkındık beretın Ǧylymi-zertteu qoryn qūrudy ūsyndy.
Mirziioev sammitte Äzerbaijannyŋ öŋırlık dialogqa qosyluyn qūptady. Onyŋ aituynşa, Äzerbaijan Ortalyq Aziiamen tarihi, mädeni jäne ruhani bailanysy bar memleket. Sammittıŋ basty maqsaty – tūraqty, qauıpsız jäne örkendegen Ortalyq Aziia qūru.
«Bızdıŋ küşımız – bırlıkte. Qarym-qatynasymyzdaǧy özara qūrmet pen yntymaqtastyq arqyly ǧana ortaq maqsattarǧa jete alamyz», – dedı Özbekstan basşysy.
Kezdesu qorytyndysynda Ortalyq Aziia elderı men Äzerbaijan prezidentterı bırlesken mälımdeme qabyldady.
Sonymen qatar tömendegı qūjattar maqūldandy:
-
BŪŪ-na müşe memleketterge 2027–2028 jyldarǧa BŪŪ Qauıpsızdık keŋesınıŋ tūraqty emes müşelıgıne Qyrǧyzstannyŋ kandidaturasyn qoldau turaly ündeu;
-
Äzerbaijannyŋ Ortalyq Aziia elderı basşylarynyŋ Konsultativtık kezdesuıne tolyqqandy qatysu turaly şeşım;
-
Ortalyq Aziiadaǧy öŋırlık qauıpsızdık pen tūraqtylyq tūjyrymdamasy;
-
2026–2028 jyldarǧa arnalǧan qauıpsızdık qaterlerı katalogy jäne olardy aldyn alu şaralary.
Jetınşı Konsultativtık kezdesu 16 qaraşada Taşkentte öttı. Sammitke Äzerbaijan prezidentı İlham Äliev, Qazaqstan prezidentı Qasym-Jomart Toqaev, Qyrǧyzstan prezidentı Sadyr Japarov, Täjıkstan basşysy Emomali Rahmon, Türıkmenstan prezidentı Serdar Berdymūhamedov jäne Ortalyq Aziia üşın BŪŪ-nyŋ aldyn alu diplomatiiasy jönındegı öŋırlık ortalyǧynyŋ jetekşısı Kaha İmnadze qatysty.
