Atyrauda qara jamylǧan qyzdardyŋ Qazaqstan tuyn qorlaǧan suretıne qatysty Mädeniet jäne aqparat ministrlıgı pıkır bıldırdı, dep habarlaidy “Adyrna” ūlttyq portaly.
Ministrlık internetke jürgızgen monitoring boiynşa, standartqa sai emes Qazaqstan Tuyn satqan 2 zaŋ būzuşylyqty anyqtaǧan.
“Wildberries.kz jäne ozon.kz internet-resurstarynda internetke jürgızılgen monitoring nätijelerı boiynşa Qazaqstan Respublikasynyŋ memlekettık rämızderı turaly zaŋnamasyn būzatyn materialdy taratu bölıgınde 2 zaŋ būzuşylyq anyqtaldy. Qazırgı uaqytta wildberries.kz internet-resursynan Qazaqstan Respublikasynyŋ arab jazuy bar Tuynyŋ satylǧany turaly aqparat joiyldy. Qazaqstan Respublikasynyŋ zaŋnamasyn būzuşylyqtardy joiu jäne zaŋsyz materialdy joiu şaralaryn qoldanu turaly ozon.kz internet-resursynyŋ äkımşılıgıne habarlama hat joldandy”, — dep jazylǧan resmi mälımette.
Sondai-aq ministrlık osy oqiǧa boiynşa Işkı ıster ministrlıgıne hat joldaǧan.
“Qazaqstan Respublikasy Qylmystyq kodeksınıŋ 372-babyna säikes Qazaqstan Respublikasynyŋ memlekettık rämızderın qorlau qylmystyq jauaptylyqqa äkep soǧady. Osyǧan bailanysty Qazaqstan Respublikasy Mädeniet jäne aqparat ministrlıgı Işkı ıster ministrlıgıne öz qūzyretı şegınde prosessualdyq şaralar qabyldau turaly habarlama hat joldady”, — delıngen ministrlık taratqan aqparatta.
Ministrlık IIM-nen naqty kımge qarsy şara qabyldaudy sūraǧanyn naqtyladyq.
“Standartqa sai emes Qazaqstan Tuynyŋ suretın jarnamalauǧa atyraulyq tūrǧyndar kınälı me, älde Wildberries.kz jäne ozon.kz platftormalary kınälı me, ony IIM anyqtaidy”, — dep tüsındırdı ministrlıktegıler.
Būǧan deiın Atyrauda özge tılde jazylǧan jazuy bar memlekettık tumen fotoǧa tüskender ūstalǧany mälım bolǧan edı.
