«Ortalyq Aziia – Europa Odaǧy» sammitı aiasynda Qazaqstan Prezidentı Qasym-Jomart Toqaev pen Europalyq komissiia prezidentı Ursula fon der Liaien kezdesu ötkızdı. Būl turaly Aqorda jazdy, dep habarlaidy “Adyrna” ūlttyq portaly.
Kezdesu barysynda Qazaqstan men Europa Odaǧynyŋ ekonomikanyŋ türlı sektoryndaǧy, sifrlandyru jäne innovasiia salalaryndaǧy yntymaqtastyǧyn damytu perspektivasy talqylandy. Taraptar Qazaqstan men Europalyq komissiia arasynda viza beru tärtıbın jeŋıldetu jönındegı kelısımge kelu üderısı bastalǧanyn oŋ baǧalady.
“Qasym-Jomart Toqaev Keŋeitılgen serıktestık jäne yntymaqtastyq jönındegı kelısım Qazaqstan men Europa Odaǧynyŋ san qyrly yqpaldastyǧyna negız bolyp otyrǧanyn jetkızdı.
Memleket basşysy Qazaqstannyŋ Europamen yntymaqtastyǧyn odan ärı tereŋdetetın tört basym baǧytty atady. Būl – energetika, ırı infraqūrylym jäne önerkäsıp jobalaryn jüzege asyru, kölık-logistika jelılerın keŋeitu, sondai-aq sifrlyq innovasiia, ozyq tehnologiialar men jasandy intellekt baǧytyndaǧy serıktestık”, delıngen Aqorda habarlamasynda.
Sondai-aq, Ursula fon der Liaien kölık-logistika salasyndaǧy, sonyŋ ışınde Transkaspii halyqaralyq kölık dälızı sekıldı jobalardy ıske asyrudyŋ maŋyzyna toqtaldy. Ol Qasym-Jomart Toqaevty Qazaqstanda sirek kezdesetın metaldardyŋ ırı ken ornynyŋ tabyluymen qūttyqtady.
Taraptar S5+EO aiasyndaǧy jūmysty jalǧastyruǧa uaǧdalasty. Sonymen qatar öŋırlık jäne halyqaralyq kün tärtıbındegı özektı mäseleler jönınde pıkır almasty.
