Turizm jäne sport ministrı Erbol Myrzabosynov Almaty qalasynda ötken jartylai marafon kezınde bolǧan qaiǧyly jaǧdaiǧa qatysty pıkır bıldırdı, dep habarlaidy «Adyrna» tılşısı.
Ministrdıŋ aituynşa, qazırgı uaqytta oqiǧaǧa bailanysty tolyqqandy tekserıs jürgızılıp jatyr.
«Qatysuşylardyŋ densaulyq jaǧdaiy, jarysty ūiymdastyru tärtıbı, medisinalyq qamtamasyz etu deŋgeiı men qauıpsızdık reglamentı jan-jaqty saraptalady. Jergılıktı atqaruşy organdar ötkızetın mūndai şaralarǧa talapty küşeitemız. Būqaralyq sport qauıpsız ärı käsıbi deŋgeide ūiymdastyryluy tiıs. Turizm jäne sport ministrlıgı būl baǧytta naqty ūsynystar äzırlep, tiıstı qūrylymdarǧa joldaidy. Qaza bolǧan azamattardyŋ jaqyndaryna köŋıl aitamyn!»—dedı ol äleumettık jelıdegı paraqşasynda.
Eske sala keteiık, 20 säuırde Almatyda jartylai marafon ötıp, jarys barysynda 84 jastaǧy Aqqoian Rsaliev pen 21 jastaǧy Nūrbol Ahmadi köz jūmǧan edı.
