Soltústik Qazaqstan oblysyndaǵy Teplıchnoe aýylynda eldi mekendi sý basýdan saqtaý úshin bógetti bekitý jumystary úshinshi kún qatarynan júrgizilýde, dep habarlaıdy "Adyrna" ulttyq portaly.
Esil ózenindegi sý deńgeıi áli de kóterilip jatyr. Óńir ákimi Ǵaýez Nurmuhambetov jaǵdaıdy kún saıyn baqylaýda ustap otyr.
"Úsh kúnnen beri táýlik boıy jumys istep jatyrmyz. Teplıchnoe aýylyndaǵy qorǵanys bógetin nyǵaıtý barysyn ózim tikeleı baqylap júrmin. Keshe 30 myń qadam júrsem, búgin de sondaı qashyqtyq júrdim", – dep jazdy Ǵaýez Nurmuhambetov áleýmettik jelidegi paraqshasynda.
Oqıǵa ornynda barlyq qajetti tehnıka jumyldyrylǵan, shatyrlar tigilgen, tamaqtaný uıymdastyrylǵan. Jumysqa 1600-ge jýyq adam – kásiporyndar men uıymdardyń qyzmetkerleri, memlekettik qyzmetkerler, áskerı qyzmetkerler jáne qutqarýshylar qatysýda.
Sondaı-aq, kómekke kórshiles óńirlerden qutqarý brıgadalary kelgen. 90 myń qapshyq tóselip, sý toltyrylǵan bóget ornatyldy. Óńir ákimi halyqpen kezdesip, barlyq qıyndyqtarǵa qaramastan kún-tún demeı eńbek etip jatqan azamattarǵa shynaıy alǵysyn bildirdi.
"Basty mindet – eldi mekenniń tolyq qaýipsizdigin qamtamasyz etý. Barlyq qaýipter joıylǵanǵa deıin jumysty jalǵastyramyz", – dedi SQO ákimi.
Qazaqstan Respýblıkasy Tótenshe jaǵdaılar mınıstrligi (TJM) Teplıchnoe aýylynda bógetti bekitý jumystaryna súńgýirler de tartylǵanyn habarlady. Mundaı sharalar jeldiń kúsheıýine jáne tolqynnyń bógetke tıgizetin keri áserine baılanysty qabyldanǵan.
Aýyl turǵyndary 25 sáýirde evakýaııalanǵan bolatyn. Ár eki saǵat saıyn Esil ózenindegi sý deńgeıi 1-2 sm-ge kóterilýde. Sý tasqynynyń sharyqtaý shegi 28-30 sáýir kúnderi kútilýde.
