Estrada salasynda sahnaǵa kúni keshe kelgen ánshiniń bir jyl ótpeı-aq konert berýi ábden múmkin búginde. Al dástúrli án salasynda bul ekeýine qol jetkizý – ánshi úshin bir beles, al tyńdarman úshin – aıtarlyqtaı oqıǵa.Bul – ulttyq ónerimizdiń muń-muqtajyn joqtap júrgen adamdardyń bárine ortaq másele. Bul jerde másele – dástúrli ánshilerdiń kásibı deńgeıinde emes, estradanyń tyńdarmany, tehnıkalyq múmkindik jáne qarjylaı jaǵdaıynyń kósh ilgeriliginde.
Tileýles QURMANǴALIEV, ánshi: – Qazirgi bizdiń qoǵam estradamen ǵana qorektenip otyr deýge bolady. Bul – maqtanarlyq jaǵdaı emes, kerisinshe, ókinishpen aýyzǵa alatyndaı másele. Qoǵamnyń sol ahýalyn kórip otyrǵan soń, mende jeke ánjınaq shyǵaratyn oı da, qarajat ta bolǵan joq. Mádenıet mınıstrliginiń tapsyrmasymen «El» prodıýserlik ortalyǵy shyǵarǵan «Qazaqtyń 1000 áni» jınaǵyn qurastyrýǵa atsalysqanym bar edi. Sol kezde kópshilik jurt onsha bile bermeıtin ánderdi taýyp, jınaqqa qosqanymdy kórgen birshama aǵalarymyz: «Sen kóp án biledi ekensiń ári daýys múmkindigińdi de bilemiz, nege dıskińdi shyǵarmasqa?!» – degen bolatyn. «Shyǵaryp beretin adamdar bolsa, qanekeı?» – degenim bolmasa, ol áńgime sol jerde qalǵan. Arada birshama ýaqyt ótken soń ol áńgimeni qaıta qozǵap, shyndyqqa aınaldyrǵan Serjan Moldasanuly degen azamat boldy. «Táke, artyńda ókshe basyp kele jatqan inilerińniń ózi jınaq shyǵaryp jatqanda, endigide seniki kesh bolyp ketedi», – dep, birden osyǵan kiristi. Mine – sonyń nátıjesi.
Dástúrli án ónerindegi Arqa mektebiniń ókili, Qaırat Baıbosynov jáne Erjan Qosbarmaqov syndy án dúldúlderiniń shákirti Tileýles Qurmanǵalıevtiń qolyna dombyra ustap, qazaq ánin áýeletýge úles qosyp kele jatqanyna da birshama ýaqyt toldy desek bolǵandaı. Eger sonyń barlyǵyn jınaqtar bolsa, bir taspaǵa syımasy anyq. Sondyqtan bul jınaqqa ánshi el onsha bile bermeıtin, halyq arasynda saqtalyp qalǵan jańa ánder engizgen.
Sondaı-aq, bir aıta keterligi, áý basta ózi Arqa mektebimen aýyzdyqtansa-daǵy, qazaqtyń qaı óńiriniń áni bolsyn qazaq balasyna jat emes. Sonyń dálelindeı, Tileýles ánshi «Oıqaraǵaı» taspasyna Jetisý ánderin engizip otyrsa kerek. Bul – bir jaǵynan, ánshiniń ózi aıtpaqshy, «aldymyzdaǵy neshe býyn oryndap ketken ánderdi» qaıtalaǵansha, jańa ánderdi jaryqqa shyǵarý maqsatynan da týǵan oı, ıaǵnı dástúrli án ónerinde óz soqpaǵyn salyp, sonyń bir ketigin toltyrýǵa degen talpynys ta.
Qazirdiń ózinde radıodan berilip jatqan álgi ánderdi qulaǵy shalǵan tyńdarman ánshige habarlasyp, alǵystaryn aıtyp jatsa kerek. Soǵan qarap, án jınaq óz tyńdarmanyn tabady ári óz kezinde dál shyqqan týyndy bolyp qalar dep úmit artatynyn ánshi jasyrmady. Tileýles Qurmanǵalıevti el aldymen dástúrli ánshi dep tanysa, ekinshi jaǵynan, ol kezinde «Serper» atty etnotoptyń múshesi de boldy. Marqum Bıǵazy Tutqabekov degen azamat qaıtys bolǵan soń, álgi toptyń taraǵany jurtshylyqqa málim. Búginde osy etno baǵytta kórermenniń yqylasyna bólenip júrgen «Qońyr», «Seriler» syndy toptar óz bastaýyn sol «Serperden» aldy desek, esh qatelespesimiz anyq. Sazger ári sheber árleýshi, prodıýser Baǵlan Omarov qurǵan «Serper» alǵash estradaǵa ulttyq ún, ulttyq keskin-kelbet, tipti ulttyq minez de alyp kelgenin kóziqaraqty oqyrman bilýge tıis. Top múshesi Bıǵazy Tutqabekovtiń kenetten kelgen ajaly tek toptyń ǵana emes, estradada ekpindeı ozyp, eldiń rýhyn oıatyp kele jatqan álgindeı baǵyttyń da tizginin tartyp qoıǵan jaıy bar. Sodan keıin bir jylǵa deıin qara jamylǵan azamattyń biri osy Tileýles Qurmanǵalıev bolatyn. Áýeli dostyń arýaǵyn syılaý, sosyn ulttyq jón-josyqqa degen qurmet sońynda ánshige osyndaı qýanysh, osyndaı jetistik bolyp qaıtyp otyr deýge bolady.
Márııam JAGORQYZY, «Alash aınasy».
