Türkıstan oblysyna qarasty Şardara audanynda körnektı aqyn, Qazaqstan jazuşylar odaǧynyŋ müşesı, ädebiet synşysy Ämırhan Balqybektıŋ qūrmetıne eskertkış-biust aşyldy. Būl turaly aqyn, jurnalist Asylan Tılegen jazdy, dep habarlaidy «Adyrna» tılşısı.
«Köŋıl quantar jaŋalyq! Aqyn, ädebiet synşysy Ämırhan Balqybek aǧamyzǧa tuǧan jerı Şardarada biust-eskertkış ornatyldy! Müsınşıge alǧys! Aǧaǧa ūqsap-aq tūr eken!—dedı ol.
Eskertkış audan ortalyǧyndaǧy saiabaqqa qoiyldy.
Aita keteiık, Ämırhan Balqybek 1969 jyly Türkıstan oblysynda tuǧan. Äl-Farabi atyndaǧy Qazaq ūlttyq universitetınde bılım alǧan. Şardara audandyq «Ösken öŋır», respublikalyq «Jas alaş», «Ana tılı» gazetterınıŋ, «Parasat» jurnalynyŋ tılşısı, «Qazaq ädebietı» gazetınıŋ bölım meŋgeruşısı, «Jas qazaq» respublikalyq gazetı ädebiet jäne ǧylym bölımınıŋ redaktory qyzmetterın atqarǧan. Aqynnyŋ bırqatar öleŋderı «Jas aqyndar poeziiasynyŋ antologiiasy», «Auyldan ūşqan aqqular», «Tolqynnan tolqyn tuady» ūjymdyq jinaqtaryna engen. «Metamorfoza», «Synǧan säulenıŋ şaǧylysuy» jyr kıtaptarynyŋ avtory. Körnektı tūlǧa 2014 jyldyŋ 8 säuırınde qaitys boldy.
