Resei prezidentı Vladimir Putin alǧaş ret Briansk jäne Kursk oblystaryndaǧy temırjol köpırlerınıŋ qūlauyna qatysty pıkır bıldırdı, dep habarlaidy "Adyrna" ūlttyq portaly.
Ol būl oqiǧalardy "terrorizm" jäne "azamattyq halyqqa qasaqana jasalǧan soqqy" dep atap, Ukrainany Reseimen kelıssözderdı boldyrmau üşın osyndai äreketke bardy dep aiyptady.
Putinnıŋ aituynşa, būl şabuyldar Stambulda 2 mausym künı ötken Resei men Ukraina delegasiialary arasyndaǧy kelıssözderge deiıngı uaqytta oryn alǧany — olardyŋ kezdeisoq emes, ädeiı ūiymdastyrylǧanyn körsetedı.
"Būl — kelıssöz prosesın būzuǧa baǧyttalǧan äreket. Ukraina bilıgı beibıtşılıkke ūmtylmaidy, kerısınşe, uaqytty qarulanu men jaŋa şabuyldarǧa daiyndyq üşın paidalanuǧa tyrysady", — dedı Putin ükımet müşelerımen ötkızgen jiynda.Putin Ukrainamen kelıssözder jürgızuge daiyn emes ekenın taǧy bır märte mälımdep, Kievtı "bıtım şarttaryn aldap paidalanyp keledı" dep aiyptady. 2025 jyldyŋ 31 mamyrynda Briansk oblysynda keşkı uaqytta temırjol köpırı qūlap, sol sätte ötpek bolǧan jolauşylar poiyzy apatqa ūşyrady. Resmi mälımet boiynşa, 7 adam qaza tauyp, 66 adam jaraqat alǧan. Onyŋ ışınde üş bala bar. Oqiǧa ornynda bastapqyda "jarylys bolǧan" degen boljam aitylǧanymen, keiınırek Reseidıŋ tergeu komitetı būl mälımettı resmi habarlamasynan alyp tastap, tek "qūrylym qūlady" dep şekteldı. Al kelesı künı, 1 mausymda Kursk oblysynyŋ Jeleznogorsk audanynda jük poiyzy ötıp bara jatqanda taǧy bır temırjol köpırı qūlady. Poiyzdyŋ bırneşe vagony avtomobil jolyna qūlap, ört şyqty. Maşinist pen onyŋ ekı kömekşısı jaraqat aldy. Osy oqiǧalarǧa bailanysty Reseidıŋ tergeu komitetı ekı bırdei qylmystyq ıs qozǧap, keiın būl apattardy "terakt" dep tanyp, Ukrainaǧa resmi aiyp taqty. Putin öz mälımdemesınde Ukraina qauıpsızdık qyzmetınıŋ "Örmek" operasiiasy aiasynda Resei äskeri aerodromdaryna jasalǧan şabuyldar men strategiialyq bombalauşy ūşaqtardyŋ joiyluy, sondai-aq Qyrym köpırınıŋ tıregıne jasalǧan şabuyl turaly bırde-bır söz aitpady.
Ūqsas jaŋalyqtar
