Şymkent qalasynda būryn sotty bolǧan ekı azamat mümkındıgı şekteulı taksi jürgızuşısıne şabuyl jasaǧany üşın türmege qamaldy. Būl oqiǧa «Köktem» bazary maŋynda oryn alǧan, dep habarlaidy "Adyrna" ūlttyq portaly.
Tergeu mälımetınşe, Jasūlan Bakirov pen Maksat Tasbolatov taksi qyzmetın paidalanyp, sapar soŋynda jürgızuşıge tap bergen. Olar kölıktıŋ terezesın syndyryp, jürgızuşını soqqyǧa jyqqan. Jäbırlenuşınıŋ estu jäne söileu qabıletı şekteulı ekenı belgılı boldy. Qasköiler ekı mobildı telefondy ūrlap, oqiǧa ornynan boi tasalaǧan. Alaida köp ūzamai polisiia olardy qolǧa tüsırdı.
Sot ükımımen Jasūlan Bakirov QR Qylmystyq kodeksınıŋ 191-baby, 2-bölıgı, 1 jäne 3-tarmaqtary boiynşa kınälı dep tanylyp, 3 jyl 9 aiǧa bas bostandyǧynan aiyryldy. Onyŋ sybailasy Maksat Tasbolatov 3 jylǧa sottaldy. Aita keteiık, Bakirov 2019 jyly tonau faktısı boiynşa, al Tasbolatov 2024 jyly ūrlyq üşın qylmystyq jauapkerşılıkke tartylǧan bolatyn.
Sot otyrysynda ekeuı de kınäsın moiyndap, zardap şekken tarapqa keltırılgen materialdyq şyǧyndy ötegen. Soǧan qaramastan, qylmystyŋ auyrlyǧyna bailanysty olar jazalaryn qauıpsızdıgı barynşa joǧary tüzetu mekemelerınde öteitın bolady.
Ūqsas jaŋalyqtar
