Bügın medisina qyzmetkerlerınıŋ käsıbi merekesıne orai oblys ortalyǧynda saltanatty jiyn öttı. Şaraǧa Batys Qazaqstan oblysynyŋ äkımı Nariman Töreǧaliev qatysyp, aq halatty abzal jandardy şyn jürekten qūttyqtady.
Saltanatty jiynda aimaq basşysy öŋırdegı densaulyq saqtau salasynda atqarylyp jatqan jūmystarǧa toqtalyp, medisina mamandarynyŋ qoǧamdaǧy orny erekşe ekenın atap öttı.
«Künı keşe Memleket basşysy Qasym-Jomart Toqaev medisina qyzmetkerlerın käsıbi merekelerımen qūttyqtap, olardyŋ qoǧamdaǧy rölı zor ekenın atap öttı. Prezident: «Därıger bolu – jürektıŋ ısı. Bız sızderdıŋ erlıkterıŋızdı baǧalaimyz»dei kele, aq halatty abzal jandardyŋ eŋbegın eskerıp, märtebesın joǧarylatty.
Oblys kölemınde de densaulyq salasyn qoldau maqsatynda auqymdy naqty jūmystar atqarylyp keledı», - dedı Nariman Töreǧaliev.
Öŋır basşysy öz sözınde «Auyldyq densaulyq saqtaudy jaŋǧyrtu» ūlttyq jobasy aiasynda oblysymyzda 50 medisinalyq nysannyŋ qūrylysy josparlanyn, onyŋ bügınde 38 nysany paidalanuǧa berılgenın habarlady. Qalǧan 12 nysannyŋ qūrylysy mausym-şılde ailarynda aiaqtalmaq.
Sonymen qatar, 2023–2025 jyldar aralyǧynda öŋırde densaulyq saqtau infraqūrylymyn damytu baǧytynda:
37 nysanda kürdelı jöndeu jürgızılse, taǧy 5 nysannyŋ kürdelı jöndeu jūmystary aiaqtaluǧa jaqyn. Sondai-aq, 8 moduldık medisinalyq ǧimarat satyp alynyp, qoldanysqa berıldı.
2023-24 jyldary oblystaǧy densaulyq saqtau ūiymdaryna su jaŋa 131 sanitariialyq avtokölık berıldı. 405 bırlık medisinalyq qūral-jabdyq satyp alynyp, oǧan jergılıktı biudjetten 3 milliard teŋge qarajat bölıngen.
Jiyn barysynda sala üzdıkterıne «Eŋbek ardagerı» medalı jäne QR Densaulyq saqtau ministrlıgınıŋ «Densaulyq saqtau ısınıŋ üzdıgı» jäne «Densaulyq saqtau ısıne qosqan ülesı üşın» tösbelgılerı, “Qūrmet” gramotalary, sondai-aq oblys äkımınıŋ alǧys hattary tabys etıldı.
Merekelık şara konserttık baǧdarlamaǧa ūlasty.
