Dılmanovtyŋ aituynşa, Qaster Mūsahan men Mūrager Älımūly saiasi bosqyn emes, memlekettık şekarany būzǧandar
Ūlttyq qauıpsızdık komitetı töraǧasynyŋ orynbasary – şekara qyzmetınıŋ direktory Darhan Dılmanov Qazaqstan-Qytai şekarasyn zaŋsyz kesıp ötken etnikalyq qazaqtar Qaster Mūsahan men Mūrager Älımūlynyŋ qazır bostandyqta ekenın mälımdedı, dep habarlaidy Sputnik Qazaqstan tılşısı.
"Şyndyǧyna kelsek, olardyŋ memlekettık şekarany qalai kesıp ötkenı ülken kümän tudyrady. Sebebı memlekettık şekarany kesıp ötu oŋai emes. Esterıŋızde bolsa, olar şekaradan 1 qazanda öttık dedı. Al būl künı bızdıŋ körşıler Qytai Halyq Respublikasynyŋ qūrylǧan künın atap öttı. Tiısınşe, barlyq memlekettık qūrylym küşeitılgen rejimde jūmys ıstedı", - dedı Dılmanov mäjılıs kuluarynda.
Aituynşa, etnikalyq qazaqtar qazır bostandyqta, qamauǧa alynǧan joq.
"Olar qazır Zaisanda. Olar bızge memlekettık şekarany naqty qai jerde kesıp ötkenın körsetuı tiıs. Özderı Tarbaǧatai dep otyr. Bız olardy Tarbaǧataiǧa aparamyz, olar qalai jäne qaidan kesıp ötkenın körsetedı", - dedı şekara qyzmetınıŋ direktory.Dılmanov olardyŋ bırı 2006 jyly mal ūrlyǧy üşın qazaq-qytai şekarasynda ūstalǧanyn mälımdedı. "Olar bızdıŋ aumaqta ūstalyp, keiın Qytai şekaraşylaryna berıldı. Al ol jaqta būl qylmysy üşın qandai jazaǧa tartylǧanyn özı aityp berer, mümkın aitqan da şyǧar", - dedı ol. Ol memlekettık şekarany būzǧandar qylmystyq jauapkerşılıkke tartylatynyn, eger kınäsı däleldense, ekı jylǧa deiın bas bostandyǧynan aiyryluy mümkın ekenın atap öttı. Al qandastardy Qytaiǧa qaitaryp-qaitarmau zaŋ aiasynda şeşıledı.
