Bügın, 12 qaraşada Jarkent qalasyndaǧy Panfilov audandyq sotynda Qazaqstan - Qytai şekarasynan zaŋsyz ötken Qytai qazaǧy Qaişa Aqannyŋ ısı boiynşa sot bastaldy.
Sotqa Qaişa Aqannyŋ advokaty Aiman Omarova, AQŞ-tyŋ Almatydaǧy konsuldyǧynyŋ, "Ata jūrt", "Otandas el" ūiymynyŋ ökılderı qatysty.
Qaişa Aqannyŋ sottaǧy sözıne qaraǧanda, ol Qazaqstan şekarasynan 2018 jyldyŋ 7 mamyrynda Qorǧas keden beketı arqyly, köpşılıkke ılese ötken.
2019 jyly tamyz aiynda ūlttyq qauıpsızdık komitetıne öz erkımen baryp, şekaradan zaŋsyz ötkenı jaily habarlaǧan. Artynşa qylmystyq ıs qozǧalyp, sot bastalǧan.
Ol Qazaqstanǧa kelgen sätte taǧy bır etnikalyq qazaq Sairagül Sauytbaidyŋ ısı boiynşa sot prosesın qadaǧalaǧanyn aitady. Öz taǧdyryn Sairagül Sauytbai taǧdyrymen ūqsastyrady. Onyŋ sözınşe, Qytaidyŋ Ile-Qazaq avtonomiialyq audanynyŋ polisiiasy "qaita tärbieleu lagerıne" qamalatynyn aşyq eskertken. Osydan keiın Qazaqstanǧa ketuge bel bailap, Qytai şekarasyna üş ret kelgen.
- Qolymda Qazaqstannyŋ vizasy bola tūra jıbermedı. Şetelge şyǧuǧa tyiym salynǧandar tızımındesıŋ dep qaitardy. Qazaqstannan pana ızdep keldım. Menı Qytaiǧa qaitarmaudy sūraimyn. Qytaida menı saiasi quǧyn kütıp tūr,- deidı ol.
Qaişa Aqan sot barysynda "Qazaqstan şekarasynan zaŋsyz ötkenın" moiyndap, oǧan Qytaidaǧy az ūlttarǧa jasalatyn qysymnan seskengendıkten barǧanyn aitty.
43 jastaǧy Qaişa Aqan Qytaida 70 jastaǧy şeşesı qalǧanyn aitady. Jalǧyz ūly da būryn ajyrasqan küieuınıŋ qolynda, Qytaida qalǧan. Qazır Almaty qalasynda päter jaldap tūrady, tūraqty jūmys ıstemeidı.
Özınıŋ aituynşa, qaraşanyŋ 11-ıne Almaty qalalyq köşı-qon polisiiasynan "Pana ızdeuşı tūlǧa" qūjatyn alǧan.
2018 jyly "Qazaqstan şekarasynan zaŋsyz öttı" degen aiyppen Qytai qazaǧy Sairagül Sauytbaidyŋ üstınen sot prosesı jürgen. Qoǧam nazaryn audarǧan sot şeşımımen Sairagül Sauytbai şartty jazamen bostandyqqa şyǧyp, keiın Şvesiiadan saiasi baspana alyp ketken.
Būǧan deiın Qytaidyŋ Şyŋjaŋ-ūiǧyr avtonomiialyq aimaǧynda tūratyn etnikalyq qazaqtar Qaster Mūshanūly men Mūrager Älımūlynyŋ Qazaqstanǧa "şekaradan zaŋsyz ötkenı" turaly aqparat taraǧan. Qazır olardyŋ üstınen tergeu prosesı jürıp jatyr.
"Azattyq" radiosy
foto avtory Nūrtai Lahan
