Serık ELIKBAI. Täuelsızdık künı...

Şaǧyn auyldyŋ qonaqtary qaladan tüs aua, keşıgıp keldı. Şaǧyn äkımşılık ışındegı oŋaşa bölmeden mol tamaqtanyp, keŋırdek toltyryp mädeniet üiıne bettedı. Sözdı äkım bastap, qonaqtardy tanystyra bastady. Oblystan kelgen jurnalist 1986-jyldyŋ sūmdyǧyn sūsty qabaǧyn tüiıp alyp, tüidek tırkestermen aqtardy... Aryqşa oquşy qyz: -Sız, sol künı qaida edıŋız?, -dedı. Jalyndy jurnalist sözı pyşyrap, şaşyla şyqty... - Men.. Almaty şetındegı üide edım... Jezdem.. syrtymnan jauyp ketıptı... Auyldan şyqqan biznesmen jıgıt äŋgımenı tötesınen bastady... - Jeltoqsan kezınde men äskerde edım... Osy oqiǧadan soŋ bızge müldem qaru bermeitın boldy... Bır jyl kazarma tazaladym... Soŋynan konsert boldy.. Meiramhanaǧa ketıp bara jatyp biznesmen: -Sekenai, qaida?-dedı. -Jür, osynda... -Jeltoqsannan soŋ oŋalmady ma? -86-da sottaldy... äkesın mektepten şyǧaryp jıberdı qoi... Ata-anasy qaitys boldy.. -Qūsadan ǧoi.. -Sekenai mekteptı altynǧa bıtırıp edı... Janyp tūrǧan jıgıt bolatyn... Mäskeuge ketemın degenınde jalǧyz ūlsyŋ dep Almatyǧa alyp qalǧan... -86-da studentterdı Alaŋǧa bastap baryp, qaita-qaita jūrt aldynda söileptı.. -Beinetıne körınıp tūrǧan ǧoi... -Türmeden jarymjan bolyp.. esı kıresılı-şyǧasyly bolyp auylǧa jettı.. -Obal.. -Qūrysyn, özımen ketsın... Sälden soŋ, alystan kelgen qonaqtar men auyldyŋ betke şyǧarlary, meiramhana ışınde qymbat şaraptarmen şükıranama tostaryna toǧytyldy... Sekenai jaryǧy küŋgırt, kütımsız üide körpege oranyp, eskıden qalǧan «Rekord» televizorynan bar yntasymen merekelık habardy körıp otyrdy...