Bloger Aibolat Bökenov sot zalynda. Oral, 5 jeltoqsan 2019 jyl.
Batys Qazaqstan oblysynyŋ polisiia departamentı oraldyq bloger Aibolat Bökenovtıŋ üstınen sotqa şaǧym tüsırdı. Bloger būǧan deiın polisiia qyzmetkerlerı jasaǧan jol apattaryn bırneşe ret äleumettık jelıge jariialaǧan.
Bökenovke «№2 qalalyq sotqa jauapker retınde şaqyrǧan» SMS habarlama kelgen. Şaǧym 22 qaŋtarda qaralady.
Polisiia departamentı şaǧym Azamattyq kodekstıŋ «Ar-namysty, qadir-qasietti jäne iskerlik bedeldi qorǧau» baby (143-bap) boiynşa bergen. Departament blogerdıŋ qazaqstandyq telearna efirınen körsetılgen sözımen kelıspeidı jäne «oblystyq polisiia departamentı men qyzmetkerlerınıŋ ar-namysyn kemsıtıp, bedelıne nūqsan keltırdı» dep sanaidy.
- Bökenov «byltyr polisiia qyzmetkerlerı 92 ret zaŋ būzǧanyn anyqtadym, oǧan polisiia departamentı bastyǧy Äbıläzımov şara qoldanǧan joq» dep mälımdegen. BAQ arqyly jariialanǧan aqparat şyndyqqa janaspaidy. Azamattardan tüsken ötınışter arasynda 2019 jyly Bökenovten departament jetekşısınıŋ atyna bır jazbaşa jäne bır ret auyzşa ötınış tüsken. Körsetılgen jaǧdai qoǧamdyq rezonans tudyrdy, – dep habarlady PD baspasöz hatşysy Bolatbek Belgıbekov.
Bökenov aryzben kelıspeidı. Ol «departament bastyǧy Maqsūthan Äbıläzımov maǧan kedergı keltıruge tyrysyp jatyr, zaŋ būzuşylyqtardy jiı tüsıruım poliseilerge ūnamaidy» deidı.
– 2018 jyly polisiia bastyǧymen äŋgımelesıp, men jol qozǧalysy erejesı nemese zaŋ būzǧan oqiǧalardy telefon kamerasyna tüsırıp, polisiiaǧa berıp otyruǧa kelıskenbız. Bır jylda 92 video tüsırıp, aryz-şaǧym qabyldaidy dep bergen nömırge joldaǧanmyn. Endı olar ondai eşteŋe bolǧan joq, video jıbermedı dep menen videolardyŋ köşırmesın sūrap jatyr. Al ol videolar mende saqtalǧan joq, – deidı Aibolat Bökenov.
Bökenov Oralda soŋǧy ailarda poliseilerdıŋ jol erejesın būzǧan sätterın internetke jariialap otyrǧan. 18 qaraşada patrul kölıgı boijetkendı qaǧyp ketkende bloger tüsırılım jasaǧan jäne «polisiia qyzmetkerıne baǧynbady» dep aiyptalǧan. Apat bolǧan jerdı tüsırıp jürgen Bökenov oqiǧa ornyna barǧan BQO polisiia departamentınıŋ basşysy Maqsūthan Äbıläzımovten qaramaǧyndaǧy qyzmetkerdıŋ qyzmettık kölıkpen baǧdarşam tūrǧan adam qaǧuyn tüsındırudı sūraǧan. 5 jeltoqsanda äkımşılık sot Bökenovke eskertu jasaǧan.
"Azattyq" radiosy
foto Mariia Melnikova
