Qazaqstannyŋ eŋ joǧarǧy bilıgınıŋ özındık senımıne selkeu tüsken sekıldı. Būl Nūrsūltan Nazarbaevtyŋ prezidenttık ökılettıgın toqtatuy jäne osy lauazymdy qyzmetke kırısken Qasym-Jomart Toqaevtyŋ odan keiıngı äreketınen baiqalady.Odan qalsa künı keşe Aisūltan Nazarbaev anasy Dariǧa men bilık elitasyndaǧylardyŋ magiia men numerolog balşy-joramalşylardyŋ kömegıne jügınetının jäne okkulttyq ädısterdı qoldanatynyn aitqan bolatyn. Pragmatikalyq eseptı qamdaityn saiasi-ekonomikalyq analiz ben rasional oidy bylai ysyryp qoiyp, äldebır tylsym küşten kömek kütetın şarasyzdyqtyŋ auany sezıledı.
Qazaqstandy otyz jylǧa juyq basqarǧan Nūrsūltan Nazarbev özınıŋ prezidenttık doǧarysyn jariialaǧan mälımdemesın ..19 jyldyŋ 19 nauryzynyŋ 19-00 saǧatynda jasauy, jaŋa prezident Qasym-Jomart Toqaevtyŋ säuırdıŋ 9-ynda kezekten tys prezident sailauyn ötkızu jönınde şeşımge kelıp, sailaudy 9 mausymǧa belgıleuı de beker emes. Qazaqtyŋ dästürlı oi-sanasynda «9» sany kielı sanalady. Aqiqatynda, sifrlar tızbegınen äldebır zaŋdylyqty ızdeu numerologiia siiaqty aqylǧa syiymsyz, ömırdegı, qoǧamdaǧy, tabiǧattaǧy özgerısterge titımdei de qatysy joq, bırqūdaişyl senımge jat ezoterikalyq nanym ǧana. Mūnyŋ bärı Aqiqattyŋ ölşemı men ony tanudyŋ metodologiiasy bolyp tabylatyn ǧylymǧa «bes qainasa sorpasy qosylmaityn» närse. Tıptı sifrlary men şartty taŋbalary sapyrylysqan arifmetika-matematika pänı ǧylym sanalmaidy, ol basqa ǧylymdardy oqyp-üirenudıŋ qūraly ǧana. Sondyqtan äldebır sifrdan mazmūn ızdeudıŋ mänı joq, özıŋdı nemese özgenı aldarqatu ekenı anyq.
Mistikamen astastyp ketken numerologiia nanymy bırqūdaişyl dınderge de jabysqan. Mysal retınde orta ǧasyrda iudaizm ışınde küş alyp ketken kabbala nanymyn atap ötuge bolady. Mūnyŋ bärı Aqiqat, Ädılettılık, Meiırımdılık, Erkındık siiaqty adamzat qūndylyǧynyŋ negızgı prinsiptık ataularyn bırıktırıp tūrǧan ūly Jaratuyşyǧa kümändanu, Soǧan balama ızdep serık qosu, Jaratuşy qūryp qoiǧan zaŋdylyqtarǧa baǧynǧysy kelmeu, sol arqyly adamzatqa arnaiy erekşelep Qūdai syilaǧan aqyldyŋ äleuetın paidalanbai, sanany ädeiı lailaudan basqa eşteŋe emes.
Äldebır künnıŋ iaki äldebır tünnıŋ erekşe qasietı joǧyn bırqūdaişyl nanymǧa aqyl arqyly kelgen İbragim paiǧambar logikalyq salystyru ädısı boiynşa äldeqaşan däleldep ketken. Sonyqtan bütkıl ǧalamnyŋ iesı ūly Jaratuşydan emes, jaratylǧan närseden (Kün, Ai, adam, tas jäne t.b. jaratylystardan) kie ızdep, odan qoldau tabuǧa tyrysu beker ıs.
Prezidenttık qyzmetıne kırese sala Qasym-Jomart Toqaev aimaqtarǧa josparlaǧan jūmys saparyn Türkıstan jäne Maŋǧystau oblysynan bastady.
https://qazaquni.kz/2019/03/26/97568.html
Miftık sanaǧa şyrmalǧan dästürlı qazaq qoǧamy būl öŋırlerdı kielı sanaidy. Osy tüsınıktı esepke alsa kerek, Q.Toqaev Qoja-Ahmet Iаssaui kesenesıne täu etıp, Beket ata men Şopan ata meşıtıne bas sūǧyp, «babalar ruhyna taǧzym» etıptı.
Ärine, zaiyrly memleketterdıŋ konstitusiialarynda da, bırqūdaişyldyqqa şaqyratyn Kielı kıtaptarda da ärkımge nanym-senım erkındıgı berılgen. Bıraq ǧalymdar men filosoftar Ahmet Iаssaui mūrasynyŋ dınge – islam dını prinsipterıne sai kelmeitını, būl «Diuani-hihmet» sekıldı bır-ekı kıtap jazǧan avtordyŋ ruhani daǧdarysqa tap bolǧan kezeŋdegı ışkı jan-düniesındegı psihikalyq auytqu men tebırenısten tuǧan poetikalyq şyǧarma ekenı jönındegı pıkırın aitpai ketuge bolmaidy. Ortaǧasyrlyq öleŋ jazudyŋ stilımen bırsaryndy örnektelgen mūndai şyǧarmadan adam ömırı men qoǧam damuynyŋ baǧytyn aiqyndaityn ǧylymi negızdeme tabu mümkın emes – şyǧarmanyŋ ön boiy sanany tūmşalaityn ezoterika men mistikaǧa toly.
Al Beket atanyŋ adam ömırıne, qoǧam damuyna qatysty közqarastary men ūstanymyn anyqtau mümkın emes. Ol artynda kıtap qaldyrmady, «Beket ata osylai dep aitty» degen ūlaǧatty söz de joq. Onyŋ tūlǧasy «qūs siiaqty äuelep ūşty», «jüzdegen şaqyrym qaşyqtyqtaǧy oqiǧany sol mezette üiınde otyryp bılıp otyrdy» degenge saiatyn aqylǧa siymsyz, äueiı aŋyz-äpsanalar arqauymen ǧana ūlyqtalǧan.
Dıntanuşylar men ǧalymdardyŋ pıkırı boiynşa, Maŋǧystau öŋırındegı «360 äulienıŋ» qatarynda aty atalatyn Şopan atanyŋ kım bolǧany belgısız. «360 äulie» tüsınıgı – bırqūdaişyl Mūhammed paiǧambardyŋ pärmenımen Mekke qalasynda qiratylǧan pūt (tas) qūdailar ideologiiasynyŋ sarqynşaq jūrnaǧy. İslam tarihynda jahili zamandaǧy arab taipalarynyŋ türlı materialdardan jan-januarlarǧa ūqsatyp jasai salǧan sany 360 qūdaiy bolǧany aitylady. İslam dınınıŋ qanat jaiuymen sol qūdailardyŋ ideologiialyq nanym-tüsınıkterı Sinai tübegıne qarai, keiın ol jerde de bırqūdaişyl islam dını nanymyna şydas bere almai şyǧysqa qarai ysyrylyp, Maŋǧystau öŋırıne oiysqany jönınde argument keltırılgen. Sondyqtan mūny da ezoterikalyq tüsınık pen mistikadan ajyratyp alu mümkın emes. Ondai nanymdarǧa ilanu sanany tūmşalap, ömırımız ben qoǧam retınde damuymyz üşın aqylymyzdy qosyp äreket etuımızge kedergı jasaidy.
Qoǧamdyq damuǧa kedergı jasap otyrǧan kemşılıkterdı anyqtau da, sony esepke ala otyryp dūrys jaŋa baǧyt aludyŋ joly bılım men ǧylymi saraptamalarǧa negızdeluı tiıs. Būl rette sanaly ärekettı qamtamasyz etıp otyratyn aqyldyŋ tıregı dep jalǧyz Jaratuşyny tanu maŋyzdy, odan basqaǧa alaŋdau, senu, sol jaqtan kömek kütu qoǧam ömırınıŋ san qyrly salasyndaǧy jaǧdaidy şynaiy baǧalauǧa mümkındık bermeidı. Saiasattaǧy bolsyn, ekonomika men äleumettık saladaǧy jaǧdai bolsyn, onyŋ qyr-syryn bılu jäne säikesınşe jospar jasau, qajettı nätijege bılım men ǧylym arqyly ǧana jetuge bolatynyn esten şyǧarmaǧan jön. Sol üşın ūly Jaratuşy adamzatqa aqyl, sana berdı…
Tūrarbek Qūsaiynov
