«Jergilikti organdar ony qaıtarýdyń kestesin jasaıdy. Al eger olaı bolmasa, onda sot arqyly óndirilip alynady».
30 qańtarda Nur-Sultanda ótken Úkimet pen Májilis depýtattarynyń kezdesýi kezinde vıe-premer Berdibek Saparbaev 2019 jyly ataýly áleýmettik kómek alǵan 75 myńdaı otbasy tabysyn jasyrǵan dep málimdedi.
«Ókinishke qaraı, byltyr osyndaı jaǵdaılar boldy. Biz barlyǵyn tekserdik. 75 myń otbasy tabysyn jasyrǵan. Qazirgi tańda 400-500 mln teńgeni bıýdjetke qaıtardyq. Qazir biz bylaı aıtyp jatyrmyz. Eger sol otbasy óz erkimen qaıtarsa, másele joq. Jergilikti organdar ony qaıtarýdyń kestesin jasaıdy. Al eger olaı bolmasa, onda sot arqyly óndirilip alynady», - dedi Saparbaev.
Byltyr Eńbek jáne halyqty áleýmettik qorǵaý mınıstrligi 70 myń otbasy ataýly kómek alý úshin tabysyn jasyrǵan, 200-ge tarta qyzmetker jaýapkershilikke tartyldy dep málimdegen.
Aqparat quraldarynda jarııalanǵan derek boıynsha, ataýly áleýmettik kómekti qaıtarý týraly talap kóp balaly analardyń narazylyǵyn týǵyzǵan. Olardyń aıtýynsha, keıbir kezde jergilikti organdar járdemaqyny taǵaıyndaý-taǵaıyndamaý máselesin sheshken kezde, tipti, az aqshanyń ózin esepke alǵan.
Ótken jyldyń sońynda jergilikti BAQ otbasynyń tabys kólemi kedeılik sheginen 104 teńgege asyp ketkeni úshin ataýly áleýmettik kómek retinde tólengen aqshany qaıtarýǵa mindettelgen, Aqmola oblysy, Zerendi aýdanynda turatyn kópbalaly ákeniń jumyspen qamtý ortalyǵyna ataýly áleýmettik kómek aqshasyna satyp alǵan zattardy aparyp bergenin jazdy.
Bıyl aqpanda Nur-Sultanda ýaqytsha baspanada shyqqan órtten bir otbasynyń bes qyzy qaza tapqan. Osydan keıin elde kóp balaly áıelderdiń narazylyǵy kúsheıip, olar bılikten járdemaqyny ósirýdi talap etken. Osydan soń Úkimet turmysy tómen otbasylarǵa ataýly áleýmettik kómekti kóbeıtken. Jańa jyldan bastap úkimet kóp balaly analarǵa jańa júıe boıynsha járdemaqy tóleı bastaǵan.
2020 jyldyń 28 qańtar kúngi jaǵdaı boıynsha, 80,5 myń otbasynan (412,9 myń adam, olardyń 265,6 myńy – bala) ataýly áleýmettik kómek taǵaıyndaý týraly ótinish túsken. Olardyń 24 myńyna AÁK taǵaıyndalǵan.
"Azattyq" radıosy
