Qazaq-qyrǵyz shekarasyndaǵy "Qordaı" avtokólik ótkizý beketi jóndeý jumystaryna baılanysty 20 aqpannan bastap jabylady. Jańǵyrtý jumystary qashan aıaqtalatyny ázirge belgisiz, dep habarlaıdy Sputnik Qazaqstan UQK shekara qyzmetiniń baspasóz qyzmetine silteme jasap.
"20 aqpannan bastap qazaqstandyq taraptan "Qordaı", al qyrǵyzstandyq taraptan "Aq jol" ótkizý beketi jabylady. Ol jerde qaıta qalpyna keltirý jumystary júrgiziledi. Jóndeý jumystary qansha ýaqytqa sozylatyny ázirge belgisiz", - dedi shekara qyzmeti baspasóz qyzmetiniń basshysy Qanatbek Sultanov.
Eki eldiń azamattaryna kún saıyn tańǵy 06.00-den túngi 00.00-ge deıin ári-beri jaıaý ótýge ruqsat etiledi. Olar tek qol júgin alyp óte alady.
Shekara qyzmeti kólikter men sheteldikterdi ótkizý úshin qazaq-qyrǵyz shekarasyndaǵy basqa ótkizý pýnkterin paıdalanýǵa keńes berdi.
Buǵan deıin ındýstrııa jáne ınfraqurylymdyq damý mınıstrligi qazaq-qyrǵyz shekarasyndaǵy "Qordaı" ótkizý beketi 2020 jyly tolyǵymen jańǵyrtylatynyn habarlaǵan edi. Jóndeý jumystarynan keıin "Qordaıda" uzyn-sonar kezek azaıyp, qazaqstandyqtar úshin shekaradan ótý jeńildeı túspek.
"Qordaı" avtokólik ótkizý beketi Jambyl oblysy Qordaı aýdany Qordaı aýyldyq okrýginiń aýmaǵynda ornalasqan.
Aıta ketsek, qazir eki el arasynda 11 avtokólik ótkizý pýnkti bar. Olardyń beseýi – kópjaqty halyqaralyq, al altaýy – ekijaqty.
