Adamzat ūrpaǧyn örbıter anaǧa qūrmetpen jol berıŋder!

 Keiıngı uaqytta jaŋa tuǧan şaranasyn kerek qylmai, tastai salatyn, tıptı, tas jolǧa laqtyryp ketetın bezbüirek analar köbeidı. Ökınışke qarai, ǧalamtor men telearna jaŋalyqtarynan taralǧan jantürşıktırer oqiǧalardyŋ keiıpkerlerı – özımızdıŋ qazaq qyzdary, qazaqtyŋ äielderı. Soǧys kezınde bır taba nannyŋ jar­tysyn bötenge bölıp berıp, jatty jatsynbai qūşaǧy­myzdy aşyp, qanşama jetımdı bauyrymyzǧa basqan edık qoi.  Eşbır ūltta joq qazaqtaǧy meiırım men köl-kösır peiıl qaida qaldy? Qazaq balasy mūndai azǧyn­dyqqa nege üiır bolyp kettı? Jalpy, mūndai keleŋsız oqiǧalar turaly şartarapqa jar saludyŋ qajetı bar ma? Kerısınşe, janymyzǧa jylylyq syilap, boiymyzǧa şuaq taratatyn qazaqtyŋ darqan peiılı men erekşe meiırım-yqylasy jaily köbırek nasihattasaq qaitedı? Ūlttyq bolmysymyzǧa qaita oralyp, joǧalyp bara jatqan qazaqy mınezımızdı, bälkım, sonda tabarmyz… Osy oraida Zeinep Ahmetovanyŋ älı jaryq körmegen kıtabynan ananyŋ balaǧa degen meiırımı, aqyl-keŋesı men ülgı-önegesı jaily üzındını oqyrman nazaryna ūsynyp otyrmyz.

Aiaǧym auyrlaǧaly berı ainalany qabyldauym basqaşa aǧysqa tüsıp, özgeşe baǧytqa būrylyp ketkendei boldy. Qaraptan-qarap mazasyzdanyp, säl närsege keiıp, bolar-bolmasqa tarylyp, tyrs etkennen sekemdenıp, būryn bolmaǧan küi taŋdau, bolmysyma jat enjarlyq pen salbökselık, ūiqyşyldyq meŋdep barady. Dıŋkem qūryp, boldyramyn da otyramyn. Naqty qai jerım auyratynyn döp basyp aita almaimyn, bıraq, tūla boiym  tügel sau emes sekıldı. Sau bolsam közım şüŋıreiıp, jaǧym sualyp, jüde­mes edım ǧoi. Alǧaş bala kötergen äielde älgı aqyn-jazuşylar asqaqtatyp suretteitın alyp-ūşqan jürek­jardy quanyş, ana atanaryn sezıngen maqtanyş bolady degenge öz basym senbeimın. Ol – börıktı jazǧyştardyŋ «osylai boluy kerek» dep ūşqyr qiialynan tuǧyzǧan jaŋsaq paiymy. Erkek bolyp jaralǧan adam äieldıŋ ışkı jan düniesınde qandai sezımderdıŋ arpalysyp jatqanyn, qandai küi keşıp jürgenın qaidan bılsın?

Al eşqandai aqyn-jazuşy da, ǧalym da emes, tıptı, bır synyp ta oqymaǧan būrynǧy äjeler: «Ekıqabat äieldıŋ bır aiaǧy – jerde, bır aiaǧy – körde»  dep, ana bolu baqytynyŋ qasyn­da tolyp jatqan qauıp-qaterdıŋ bar ekenın bıldırgen. Olar bılgen soŋ aitqan. Men sekıldı tūŋǧyşy boiyna bıtken jas kelınşek aldynda ne kütıp tūrǧanyn şamalap boljasa da, bolmai qoimaityn şyndyqpen betpe-bet kelgende qal-jaǧdaiynyŋ qalai bolaryn ūqpaidy. Belgısız bır būldyr dünie. Belgısızdık qaşanda syry ışıne bügılgen qūpiialy, tıptı, üreilı. Oi salmaǧy ylǧi basyp, būrynǧy qalypty tırlıgınıŋ qabyrǧasy qaqyrap, būrandasy bosap, töŋıregı tügel özgergendei küige enedı. Basqa­syn bylai qoiǧanda, kiım ekeş kiımnıŋ özı jaǧdaiyŋnyŋ basqaşa ekenın badyraityp betıŋe «basady». Sausaqqa şaq saqinadai jarasa ketetın köilekterıŋnıŋ bırde-bıreuın kie almaisyŋ.

Bet demekşı, onyŋ da jetısıp tūrǧany şamaly. Künı keşegı kırşıksız jüzıŋe köldeneŋdei tüsken qūrym qoŋyr noqtaǧa, maŋdaidan iekke deiın jaiylǧan sekpılderge közıŋ tüskende, adamnyŋ köŋılıne pysqyrmaityn, berekesı ketken betıŋdı äşkerelep beretın ainany jek köresıŋ. Qaraǧyŋ kelmeidı. Abaisyzda qarai qalsaŋ, köŋıl-küiıŋ nıldei būzylyp, özıŋdı aiap, müsırkei bastaisyŋ. Būl – eŋ bır süikımsız sezım. Osy älgınde bailauy şeşılıp, basym­nan syrǧyp tüsken oramaldy jöndep qaita salarda qyr­tysy qalyŋ qyrsyqtyǧym ūstap, şarainaǧa köz sal­madym. Öşımdı alǧandai kekıreiıp, qasynan ötıp kettım.

Aitsa da, osy oramaldy är närsege jauaby daiyn jer tübındegını bıletın şeşem enşıge bergendei maǧan myqtap jabys­tyrǧan. Tūlymşaǧym jelbırep jürgen kışkene kezımde ūiyqtar aldynda basyma jympityp tūryp oramal bailaityn da: «Tün auyr, tün tylsym, tün qauıptı. Qaraŋ­ǧyda jyn-şaitandar şaşau jatqan, aşyq-şaşyq qalǧan närselerdı aŋdidy. Jalaŋbas jatsaŋ, sol bäleler iektep ketedı», – deitın. Anamnyŋ mūndai sözderınen keiın tünde tügılı, kündız de oramal saluǧa beiıl edım. Keiın öskenımde «Asüide jürgende oramal-şarşysyz bolma, äzırlegen tamaǧyŋnan şaşyŋ şyqsa, abyroiyŋ tögıledı, jasaǧan asyŋ aram bolady» deitındı qūlaqqa qūidy. Endı kelıp: «Aiaǧy auyr äiel şaşy qobyrap jalaŋbas jürse, ıştegı balaǧa albastydai körınıp şoşytady. Ol bärın köredı, bärın estidı», – dep zäremdı ūşyrdy. Ras bolsa, ras şyǧar, mamandar: «Iştegı şarana syrt­taǧy jaqsy-jaman äserdıŋ bärın qabyldaidy», – dep aityp ta, jazyp ta jür ǧoi.

Oramaldy aitam dep anamdy eske aluym sol edı, jūdy­ryqtai jüregım būlqynyp-aq kettı. Ailap-jyldap jüzdespegendei saǧynyş tolqyny sanamdy kernei bastady. Şyndyǧynda, ol kısı­nı körmegenıme ekı aptadan asty. Äsiia deitın jeŋgemnıŋ törkınderı tūratyn Taşkent qalasyndaǧy qūdalaryna qonaqqa ketken.

Keiıngı kezderı menşıktı mekenıme ainalǧan syqyrlaq divanǧa kelıp qisaidym. Qiialmen är qiyrdyŋ basyn bır şalyp, syrǧyma oidyŋ jetegıne erıp, jabyrqap jatqanymda esıktıŋ qoŋyrauy syldyrlady. Ornymnan süiretıle tūryp, şūbalaŋdap baryp esık aştym. Aştym da, eles körgendei öz közıme özım senbei, aŋyraiyp tūryp qalyppyn. Mūndai da keremet bolady eken-au, kelıp tūrǧan – älgınde saǧynyp esıme alǧan anam eken!

– Apa, apataiym! – dep qūşaqtai aldym.

– Botam-au, botam! – dep qairan şeşe emırenıp, ainalyp-tolǧanyp, aimalap jatyr.

Alǧaşqy abyr-sabyr qauyşu, aman-esendık sūrasudan keiın anam jailanyp otyryp, jan-jaǧyna barlai qarap:

– Qazanbasym körınbeidı ǧoi, – dedı. Basy ülken küieu balasyn erkeletıp osylai ataityn.

– «Bır jūmysym bar» dep baǧana ketken, it bılsın be qaida jürgenın, – dep qyrtiia jauap berdım. Qyrtiiatyn jönım bar, menı üige jalǧyz tastap, özı qydyryp ketken jūbaiyma bıraz «dämdı» söz arnaǧym kelıp, sony aityp şaǧynuǧa oqtalyp, kömekeiım bülkıldei bastaǧan.

– E-e-e, er-azamatty üiden bezdıretın äieldıŋ qabaǧy ǧoi. Senıŋ şikı örıktei kögergen jüzıŋe qarap otyruǧa kım qūştar deisıŋ, – degenı. Aiaq astynan men kütpegen tūzdyǧy mol sözdı estıgenıme şydamai, ernım dırıldep, mūrnym tyrjiyp, kemseŋdep jylauǧa tyrystym.

– Täit ärı! Közıŋnıŋ jasyn körsetpe maǧan! – dep zekıp jıberdı. Al kerek bolsa! Jaŋa ǧana aialap tūrǧan alaqany jūmylǧan jūdyryqqa ainalyp şyǧa keldı. Aşy bolsa da aşyǧyn aitatyn, tötesınen tura söileitın būl kısımen taitalasuǧa menıŋ qauqarym jetpeidı. Şapanyna astar boluǧa jaramaimyn. Osyny jaqsy bılgendıkten qūlaǧymdy qarityn suyq söz estısem de, ary qarai uşyqtyrmai, közımnıŋ jasyn jūtuǧa tura keldı.

– Botam-au, sol! – dedı bıraz ünsızdıkten soŋ jylandy ınınen şyǧaratyn jyly ünımen. – Qazır senıŋ jaǧdaiyŋda közdıŋ jasy ıştegı şaranaǧa kesırın tigızedı, jasyq bolyp qalyptasady. Keiın beimaza jylauyq, äljuaz osal bolady. «Işten qisyq tuǧandy tezge salsaŋ tüzelmes» dep ata-babalar beker aitty deisıŋ be?! Anasy neǧūrlym sergek, köŋıldı jürse, jaryq düniege keletın balanyŋ mınez-qūlqy jaidary ärı jaqsy jetılıp, jeŋıl şiraidy, ainalasyna tez beiımdeledı. Jüktılık – auru emes, Jaratqan iemnıŋ maŋdaiyŋa bergen keremet syiy, teŋdesı joq meiırım-şarapaty. Būl künge jetken de bar, jetpegen de bar. Jüregıŋnıŋ astynda bır tırşılık iesı ömır sürıp jatyr. Boiyŋdaǧy būryn bolmaǧan ärtürlı beimälım özgerıster – sol tırı jannyŋ qalyptasyp ösuıne baila­nysty tuyndaǧan qajettılıkter. Al sen bolsaŋ özıŋdı «nauqaspyn» dep sendırıp, soǧan beiımdelıp, tösekten tūrǧyŋ kelmeidı. Tüske deiın ūiyqtap, keşke deiın közın uqalaityn jalqaulyqqa, maubastyqqa äbden daǧdylanyp alǧansyŋ. Suy tartylǧan kölşıktegı qūrbaqadai qūrysyp-tyrysqan sūryŋ bar bolsyn! Bır jumai jatyp boiauy ketetın sapasyz bözdei oŋyp, ūnjyrǧaŋ tüsıp, myljalanyp otyrsyŋ. Ainalaŋnan ylǧi aiauşylyq esırkeu kütıp, müsäpırsıgenıŋdı qoi, balaŋ ynjyq, raqym tılegış beişara bolyp qalady. Saǧan qazır keregı – serpılıp sergu, sılkınıp eŋseŋdı köteru. Ügılıp üide otyra bermei, dalaǧa şyǧyp, myna ırgeŋde tūrǧan baqqa baryp, keŋ tynystap, erkın seruende. Köŋıldı än-küi tyŋda. Tiegı ketken dombyra sekıldı mıŋgırlemei, meiırlenıp aşyq-jarqyn söile, jaqsy söz ait. Sonda oiyŋ ūştalyp, qiialyŋ qanattanady. Auyr närse köterme, bıraq, köp qozǧal, keiın tolǧaǧyŋ jeŋıl, säbiıŋ denı sau ömırge keledı. Bıle bılseŋ, sen qazır eŋ körıktı, eŋ ädemı äielsıŋ! Öitkenı, bır äuletke ūrpaq äkelıp, aq jaulyqty ana atanaiyn dep otyrsyŋ. Äiel adamda būdan ötken baqyt bolmaidy. Jaratqannan jaqsylyq tılep, osy künıŋe şükırşılık et. Jürek taza bolsa, tılek qabyl bolady. Alla keŋşılıgın, raqymyn bersın! – dep sözın bır qaiyrdy.

Osy üzılıstı paidalanyp, äŋgıme auanyn basqa baǧytqa būrǧym keldı. Äitpese, menı bırese – şikı örıkke teŋedı, bırese – qūrbaqaǧa qosaqtady, boiauy ketken böz de, tiegı taiǧan dombyra da boldym. «Ūstaǧan jerde qoly, tıstegen jerde tısı ketetın» sūŋǧyla adamǧa qarsy söz aityp, bereke tappaisyŋ. Sözben şalam deseŋ özıŋ şalqaŋnan tüsesıŋ. Sondyqtan ary qarai taǧy da tüidektetıp, tögıldırıp äketpeuı üşın beikünä sūraqty köldeneŋdete saldym.

– Täşkennen qaşan keldıŋız?

– Aldyŋǧy künı kelgenmın. Keşe qozǧalmai otyryp, saǧan ekı köilek tıktım. Men senıŋ qalyp-razmerıŋdı bılemın, sonda da kem-ketıgı joq pa eken, kiıp körşı, – dep sömkesınen oramalǧa oralǧan tüiınşektı şyǧardy.

Apamnyŋ qoly öte şeber, bır körgen ülgısın ainytpai keltıru būl kısıge qiyn emes. Äkelgen köilekterınıŋ bıreuı – ädemı güldı bätesten, ekınşısı – älemnıŋ qai tükpırınen körseŋ de: «Men özbektıkımın!» – dep jar salyp tūratyn türlı-tüstı şäiıden eken. Ekeuın de keudesınen sändep bürıp, etek-jeŋın keŋ-mol tıgıptı.

– Men mūndai köilekterdı kimeimın, – dep bırden yrşyp tüstım.

– Tüh, osy senıŋ tyz etpe mınezıŋ-ai! Tulamai aldymen tyŋda, – dedı iyǧymnan sılki ūstap özıne qaratyp. – Būl köilekterdı erıkkennen ermek etıp, köz maiymdy tauysyp tıkkenım joq. Senıŋ qamyŋdy, jaryq düniege älı kelmegen şarananyŋ amandyǧyn oilap tıktım. Qiqarlanbai, qarsylyqsyz kiesıŋ. Nege ekenın aitaiyn. «Menı kör» degendei ışıŋdı tyrsityp köşede kele jatqanyŋda, qarsy aldyŋnan şyqqan kez kelgen adamnyŋ közı eŋ aldymen qarnyŋa tüsedı. Är adamda ärtürlı deŋgeide nazar bolady, közınıŋ sūǧy bolady, keibıreulerdıŋ janarynda otty uyt ta kezdesedı. Ol adamdar saǧan ädeiılep kesırın tigızeiın demeidı, sende şaruasy joq. Alaida, özınıŋ közınde qanşalyqty nazar baryn bılmeidı, ony oilamaidy da. Al kölgemedei kölkıldegen köilek köldeneŋ közderdıŋ erıksız qadalar sūǧynan saqtaidy, ärı onsyz da tar qūrsaqta jatqan balaǧa syrttan qosymşa qysym tüspeidı. Balanyŋ dene müşelerınıŋ emın-erkın ösuıne keŋ kiım aitarlyqtai septıgın tigızedı. «Jaman aitpai, jaqsy joq», näreste ışten kem-ketıktı tumauy üşın būl da bır saqtyq şarasy. Äsırese myqyndy qysatyn kiım aiaǧy auyr äielge qauıptı. «Qaiter deisıŋ, kiımde tūrǧan ne bar, özıme ūnaǧa­nyn kiem» dep özımşıldıkke salynu orny tolmas ökınışke ūryndyruy äbden mümkın. Kımge bolsa da Qūdaiym ondaidyŋ betın aulaq etsın. Pende paqyr qaşan, qai jerde qauıp-qater, jazym baryn boljai almaidy. Jaratqan iem saqtanǧandy saqtaidy, – dep bır tynystady.

Anamnyŋ qaşanǧy ädetı, basymdy būra tartyp, būlqynyp tūrǧan kezdıŋ özınde qūryǧyna tüsırıp, juasytyp jıberedı. Älgındegı tamyrynan tartyp, töndıre aitqan, tüstep-tügendegen uäjderı kökeiıme qonyp, oilantyp-aq tastady. Oilantyp qana qoimai, jüiesımen sendırdı. Menıŋ ikemge kelıp, jūmsarǧanymdy bıle qoiǧan apamnyŋ dausy tıptı jarqyn-jarqyn şyqty.

– Myna şäiı – özbekterdıŋ «hanatlas» dep atalatyn eŋ ätuerlı, eŋ qadırlı, kez kelgennıŋ qoly jete bermeitın öte joǧary sapaly jıbegı. Atam zamanǧy köne ädıspen qoldan toqylatyn būl atlas tek Özbekstanda ǧana jasalady deidı. Bızdıŋ dükenderdegı Täşkennen keletın türlı-tüstı şäiıler «hanatlastyŋ» şüiınşısıne tūrmaityn, qolyna su qūiyp beruge äreŋ jaraityn änşeiın köpşılık qoldy kezdemeler eken.

Al bätestıŋ aty – bätes. Jerden önetın maqta talşyǧynan toqylǧan tabiǧi mata. Baiqaisyŋ ba, ekı köilektıŋ de tüsterı aşyq, boiauy qanyq. Solai bolǧany jaqsy. Nege deseŋ, sūqtana qaraǧan közdı aldaidy, alǧaşqy nazar ışıŋe emes, köilekke tüsedı. Sodan keiın saǧan böten qospasy bar jasandy jıpten daiyndalǧan kiım kiiuge bolmaidy, aua jıbermei, tändı tūnşyqtyrady. Ol da balaǧa ziianyn tigızedı. Qane, bälsıne bermei, mynalardy kiıp körseŋşı, – dep tauaryn saudalaǧan saudagerdei köilekterdıŋ törkınınen bastap, maqtauyn jetkızıp, baǧasyn aspandatyp tastady.

Sytylyp keter syltauym joq bolǧan soŋ, «moda» körsetudı dardai aty bar «hanatlastan» bastadym. Bäse deimın-au, anamnyŋ bılmegenın it jesın, aitsa, aitqandai-aq bar eken. Köilektı iyǧyma ılgennen onyŋ matasynyŋ asyldyǧy, tegınıŋ tazalyǧy bırden sezıldı. Özı jep-jeŋıl, qūstyŋ mamyǧyndai jūmsaq, denege ülbırep öte jaǧymdy tidı. Tyrystyryp kiıp jürgen köilekten qūtylyp, tūla boiym qūrsaudan sytyl­ǧandai erkınsıp, jyrǧap qaldy…

Mata, köilek turaly būl äŋgıme ötken ǧasyrda, menıŋ ekı müşelge de tolmaǧan kezımde bolyp edı. Qazır mümkın söz etuge tūrmaityn körınıs şyǧar. Nege deseŋız, «defisit» kelmeske ketken. Daiyn kiımnıŋ de, matanyŋ da aluan türı ızdemei-aq tabylady. Äsırese matalardyŋ arzany da, ortaqoldysy da, asyl-qūndysy da közdıŋ jauyn alyp, düken sörelerınde jainap tūr. Jaǧdaiyŋa qarai boi-tūrqyŋa, talǧamyŋa laiyqtap tıgıp kie ber. Bıraq, amal qanşa, bır kezdegı qolǧa tüspeitın mata köbeigenımen, köilek kietın äiel azaiǧan. Būl künde ūrǧaşy qauymy köilekten jerıgen zaman. Kärı-jas, aryq-semız demei, jarasqan-jaraspaǧanyna qaramai, şalbarlanyp şauyp jür. Äsırese üstındegı kiımınıŋ tıgısı jyrtylardai tyrystyryp, töŋkerılgen tegenedei ışın alǧa şermitıp kele jatqan aiaǧy auyr kelınderdı körgende: «Ättegen-ai, būl beibaqtardyŋ aqyl aitar anasy, qamqor bolyp ülgı körseter enesı joq pa eken?» – dep qynjylamyn.

Bırdı aityp, bırge ketıppın ǧoi, bastaǧan negızgı äŋgımege qaita oralaiyn. Söitıp, älgı ekı köilek aiaq-qolymdy bauyryma alǧanşa üstımnen tüsken joq. «Hanatlas» köilegım menıŋ bırkierıme ainaldy. Mıne, bügın de sony kiıp, emhanaǧa baraiyn dep jatyrmyn. Şynym­dy aitsam, baru kerek bolǧan soŋ, bosanarda perzenthanaǧa därıger jazbalary qajet bolatyndyqtan baramyn. Obaly ne kerek, menı baqylaityn ükı köz därıger ai saiyn äldebır auytqular joq pa dep tekserıp, qan qysymymdy ölşep, därumender berıp degendei, öz mamandyǧy boiynşa mın­detın atqaryp, qyzmet körsetedı. Qamqorlyǧyna rizamyn. Äitse de, ükı közdıŋ taqpaq aitqandai taqyldatatyn «konsultasiiasy» anamnyŋ aqyl-keŋesınen artyq emes. Därıger bıle bermeitın, mümkın, bılse de jetesıne jetkıze almaityn talai mäselenıŋ qyr-syryn anam qarapaiym ūǧymdy tılmen sanama sıŋırıp, miyma qūiady.

Aiaǧym auyrlaǧan bastapqy ailarda men köp qinaldym, köŋılıme ärtürlı küdık kırıp, ürei ūialady. Ūzyn dünie qysqaryp qarys qalǧandai, selt etkızerı joq bedersız bırkelkı sūrǧylt künder bıtpeitındei körındı. Sabyrym sarqylyp, taǧatym tausy­lyp, şamam ekı közıme jetıp jürgen kezde anam özınıŋ parasatymen, meiırımımen menı ruhani jüdeulıkten, tyǧyryqtan alyp şyqty. On qūrsaq köterıp, ömırdıŋ būralaŋ būrylysy köp soqpaqtarynan ötken anamnyŋ qasietı me, ol kısı aitatyn babalar ūlaǧatynyŋ qūdyretı me, sanamdy tūmşalaǧan tūmandy oilardan arylyp, keler künge üreimen emes, ümıtpen qaraityn şamaǧa jet­tım. Ras, aldaǧy qaterlı sät jaqyndaǧan saiyn qobaljyp, alaŋdap qalam. Ol jaily oilamauǧa tyrysamyn, alaida, jaryq dünienı körgısı keletın ıştegı «keremet» büiırımdı türtkılep, esıme sala beredı.

…Emhanaǧa jaqyndap qalǧanymda qarsy kele jatqan özım sekıldı kelınşekke közım tüstı. Ol da därıgerdıŋ keŋesınde bolsa kerek. Qazaqtan söz qalǧan ba, «ailas äiel – mūŋdas» dep tegın aitpaǧan, myna beitanys, bıraq, maǧan ūqsaityn äielge bırtürlı jüregım eljırep, tıleulestıkpen üzılıp qaraiyn kelıp. Pa, şır-ke-en! Jürısınıŋ saltanat-sänın-ai! Basyn şalqaq ūstap, keudenı keŋge salyp, aiaqty kerbez de maŋǧaz basady! Jürıp emes, qalqyp kele jatqandai. Iаpyr-ai, būryn qalai baiqamaǧanmyn, aiaǧy auyr äielder tömen qarap jürmeidı eken-au! Olar mūny paŋdanyp ädeiı ıstemeidı, Jaratuşynyŋ özı bylaiǧy adamdardan erekşelendırıp, asqaqtatyp, ädemılep qoiǧan. Osyǧan deiın basyma kelmegen oiyma jaŋalyq aşqandai taŋǧaldym. Taŋǧaldym da, özıme-özım riza bolyp, köŋılım şalqyp kettı. «Ou, jarandar! Jüzınen kün şuaǧy şaşyraǧan, aq alǧysty bolǧan sūlu äiel mamyrlai basyp kele jatyr! Adamzat ūrpaǧyn örbıtetın bolaşaq anaǧa qūrmetpen jol berıŋder!» – dep maǧan ūqsas kelınşek üşın mynau jalpaq älemge jar salǧym keldı.

Kenet… «Qūdaiym-au, men de… Men de…» dep jan-jaǧyma masattana qaradym.

Zeinep AHMETOVA,

"Almaty aqşamy".