Eljan Bırtanov: Qazaqstanǧa kelgen 488 myŋ adam tekserıldı, koronavirus tırkelgen joq

Densaulyq saqtau ministrı Eljan Bırtanov Qazaqstanǧa 6 aqpannan bastap kelgen 488 myŋnan astam azamattyŋ tekserılgenın mälım ettı, dep habarlaidy QazAqparat tılşısı. «6 qaŋtardan bastap türlı şaralar qabyldanyp, 1 aqpannan bastap ol şaralar küşeitıldı. Bügıngı künnen bastap arnaiy bas sanitarlyq därıgerdıŋ şeşımı qabyldanyp, qosymşa sanitarlyq-epidemiialyq şaralar küşeitıldı. Jalpy bızdıŋ eŋ bırınşı maqsat – Qazaqstan Respublikasynyŋ memlekettık şekarasyna kelıp jatqan azamattardyŋ densaulyǧyn tekserıp, baqylauǧa alu. 6 aqpannan bastap 488 myŋnan astam azamat (qazaqstandyq, ışınde şeteldıkte de bar) Qazaqstanǧa keldı. Olardyŋ bärın bız şekarada jaǧdaiyn tekserıp, temperaturasyn ölşep qarap otyrmyz. Anketa toltyryluda», - dedı dedı Eljan Bırtanov elordada ötken baspasöz mäslihatynda. Ministr solardyŋ arasynda 175 nauqas jatqyzylyp, emdelıp şyqqanyn aityp öttı. Olarda türlı infeksiialyq respiratorlyq aurular bolǧany anyqtaldy. Keiın koronavirus infeksiiasy boiynşa tekserılıp, 160-y şyǧarylǧan. «Bıraq olarda koronavirus infeksiiasy tabylǧan joq. Sonymen azamattar elge kelgennen keiın bızdıŋ arnaiy medisinalyq qyzmetkerler bärın monitoringıge alyp otyrady. Al jalpy QHR-dan kelgen 24 myŋ azamatty monitoringıleuge alǧanbyz. Qazır 23 647 monitoringıden şyǧaryldy. 14 kündık karantinnen soŋ qalǧanyn şyǧaramyz», - dedı ol.