Şuaqty köktemnıŋ alǧaşqy künı taǧy bır merekemen tolysty. Tūŋǧyş ret atalyp otyrǧan «Alǧys aitu künıne» orai serıktestıgımızdıŋ jastarǧa arnalǧan josparly şarasy jalǧasyn tapty. «Ūlas-elektron» JŞS-nıŋ ūlt mūrasyn ūrpaqqa nasihattauǧa arnalǧan «Mäŋgılık eldıŋ mäŋgılık qūndylyqtary» taqyrybyndaǧy arnaiy jobasy aiasynda kezektı taǧylymy tereŋ ıs-şara öttı. Almaty tehnologiialyq universitetınıŋ qoldauymen ötken merekelık keşte Qūrmanǧazy atyndaǧy qazaq ūlttyq konservatoriiasynyŋ oqytuşysy, QR eŋbek sıŋırgen qairatkerı Erkın Şükıman asqaqtata än saldy, tyŋdauşylar qoşemettep tamsandy. QR eŋbek sıŋırgen qairatkerı, küişı, ūstaz Mūrat Äbuǧazy kümbırlete küi tögıp, jastardyŋ jürek qylyn terbedı. Qazaq memlekettık qyzdar pedagogikalyq universitetı baspasynyŋ direktory, QR mädeniet qairatkerı, aqyn Serık Qaliev jyrdan şaşu şaşyp, jiylǧan jūrtty jelpındırdı. Arnaiy qonaq retınde belgılı qoǧam qairatkerı Asyly Osman, Almaty qalasyndaǧy etnomädeni ortalyq qyzmetkerlerı şaqyryldy. Oqu ornynyŋ studentterı dästürlı önerdıŋ tūnyǧynan susyndap, babalar mūrasyna, kielı önerdıŋ bügıngı nasihatşylaryna rizaşylyq bıldırdı.
Aişat OMAROVA,
Almaty tehnologiialyq universitetı Jastar keŋesınıŋ töraiymy:
– «Ūlas-Elektron» JŞS-nıŋ bügıngı taŋda qazaqtyŋ dästürlı önerın nasihattap, äuezdı änı men küiın ündestıre otyryp, kezdesu ötkızuı qūptarlyq ıs, äsırese, bız siiaqty tehnikalyq mamandar daiyndaityn joǧary oqu oryndarynda kelelı ıs-şaralar ötkızıp, jastardyŋ ūlttyq ruhyn oiatyp, jıgerlendırıp, ūltjandylyqqa baulyp jürgenı köŋıl quantarlyq. Al, bügın bızdıŋ bılım ordamyzda «Alǧys aitu» künıne orai keremet kezdesu ūiymdastyryldy. Studentterımız ruhani azyq alyp, qazaqtyŋ ejelden kele jatqan dästürlı än-küi önerımen jandüniesın baiytyp, patriottyq sezımderın oiatty. Sol sebeptı de «Ūlas-Elektron» kompaniiasy ūjymyna studentter atynan alǧysymdy bıldıremın! – dedı.
Özge diaspora ökılderınıŋ studentterı qazaq halqyna alǧysyn bıldırıp, jürek sözderın aitty.
Baqytjamal RAQYMJANOVA,
Almaty tehnologiialyq universitetınıŋ studentı (tatar ūltynyŋ ökılı):
– Bügıngı 1 nauryz – Alǧys aitu künımen barşaŋyzdy qūttyqtaimyn! Özge ūlt ökılderı qazaqtyŋ şaŋyraǧy astynda tatu-tättı tūryp jatqanyna, ärine, quanyştymyz. Myna bızderdı jatsynbai, bölıp-jarmai, bauyryna basyp otyrǧan qazaq bauyrlarymyzǧa myŋ da bır alǧys!
Diana ROLOVA,
Almaty tehnologiialyq universitetınıŋ studentı (orys ūltynyŋ ökılı):
– Elımızde alǧaş toilanyp jatqan merekemen qazaq halqyn qūttyqtaimyn! 130-dan astam özge ūlt ūrpaqtary meken etken Qazaqstan memleketıne däl osyndai mereke qajet dep oilaimyn. Būl – bızdı bügınge deiın öz balasyndai körıp, qolda baryn aiamaǧan qazaq jūrtşylyǧyna ystyq yqylasymyzdy bıldıruge taptyrmas mümkındık desem da artyq emes… – dep, aǧynan jaryldy.
Baǧzydan kele jatqan ūlttyq muzykalyq qazynamyzǧa syzat tüsırmei, şaşauyn şyǧarmai saqtau, ony älemge paş etu – ūlttyq mädeniettı zamana köşınen qaldyrmaudyŋ qamy. Sondyqtan da jyrşy, dästürlı änşıler men küişılerımız köneden kele atqan än men termenı, qūdyrettı küi sazyn jas buynǧa nasihattaudan jalyqqan emes. Halyqtyq önerdıŋ ökılderın jastarmen jiı qauyşuǧa dänekerlık jasap jürgen serıktestıktıŋ basty maqsaty – ūly mūralardy ūrpaq sanasynda jaŋǧyrtyp, jandandyryp, tereŋ tanym qalyptastyruǧa yqpal etu. Töl önerımızdı tynbai nasihattap kele jatqan serıktestıgımızdıŋ nätijelı jūmysy aldaǧy uaqytta da jalǧasa bermek.
Jūldyzai ÄBDIMANAPQYZY, "Almaty aqşamy".
