Mundaı boljamdy elimizdiń bas sanıtar dárigeri Jandarbek Bekshın aıtty, dep habarlaıdy azattyq-ruhy.kz.
«Bizdiń boljamymyz boıynsha, 11-16 naýryz aralyǵynda Qazaqstanǵa koronavırýs jetýi múmkin. Bir apta kesh, bir apta erte. Koronavırýs paıda bola qalǵan jaǵdaıda arnaıy sharalardy qolǵa alamyz», - dedi Jandarbek Bekshın.
Bas sanıtar dáriger mundaı málimdemeni jýrnalısterdiń «Oqýshylar men stýdentter koronavırýsqa qaýpine baılanysty qashyqtan oqý rejımine aýysýy múmkin be?» degen suraǵyna jaýap bergende jasady. Jýrnalısterdi alańdatqan másele - Qazaqstanda COVID-19 ınfekııalyq aýrý tirkelmese de saqtyq sharalary aıasynda oqýshylar men stýdentter qashyqtan oqýǵa daıyndyǵy bolatyn. Bekshınniń aıtýynsha, koronavırýs juqtyrǵan adam tirkelgen jaǵdaıda, Qazaqstan arnaıy sharalar qabyldaýǵa saqadaı saı.
Sondaı-aq bas sanıtar dáriger Eýropanyń qamsyz júrgen elderinde koronavırýs qatty órship ketkenin aıtyp, Qazaqstan saqtyq sharalaryn 2020 jyldyń 6 qańtarynan bastaǵandyqtan, elde bul ınfekııany juqtyrǵan adam ázirge tirkelgen joq.
Bas sanıtar eldi eleńdetken málimdemesiniń sebebin túsindirdi.
«Bul boljam, al boljam degenimiz dál kele bermeıdi. Qudaı onyń betin ary qylsyn. Biraq bizde ǵylymı top bar, olar vırýstyń kelý qaýpin matematıkalyq modeldeý arqyly esepteıdi. Matematıkalyq modeldeý boıynsha biz (Qazaqstan – avt.) sheńberdiń ortasyndamyz, al sheńber tarylyp keledi. Aldymen vırýs Qytaıda boldy, keıin Iran men Ońtústik Koreıa qosyldy. Qazir bizdi Eýroodaq elderi qatty alańdatyp otyr. Vırýstyń kelý qaýpi birneshe esege ósti», - dep túsindirdi Bekshın.
