Qazaqstan Respublikasy Täuelsızdıgınıŋ 25 jyldyǧyna orai, Şyǧys Qazaqstan oblysy, Aiagöz audanynyŋ Naryn auyldyq okrugınde Şyŋqoja batyrǧa arnalǧan eskertkıştıŋ saltanatty aşyluy öttı.
Şyŋqoja batyr Bazarqūlūly (1706 qazırgı Şyǧys Qazaqstan oblysy Aiagöz audany) – aǧa batyr. Şyŋqoja batyr - naiman ışındegı qarakerei ruynyŋ tuma tarmaǧynan şyqqan. 1727 j. Būlanty-Bıleutı şaiqasynda jeke erlıgımen közge tüsıp, jas batyr atanǧan. 1730 j. Aŋyraqai-Alaköl şaiqasyna, 1741 j. Şyŋǧystaudaǧy Şaǧan şaiqasyna qatysyp, tuma, toqpaq, baiǧana rularynan qūralǧan jasaqqa basşylyq etken. 1752 – 1754 j. Jetısu, Altai, Tarbaǧatai öŋırlerın joŋǧarlardan azat etu joryqtarynda daryndy qolbasşy retınde el qūrmetıne bölendı.
Şynqojanyŋ batyr ataǧy alǧaş şyqqany – Jonǧardyŋ «Aiuqara» atanǧan Doba degen batyrymen jekpe-jekke şyǧyp, ony öltırgen kezı, ol kezde batyr 21 jasta eken. Osyndan bastap talai şaiqastarda eren erlıgımen közge tüsken batyrdyŋ daŋqy el arasyna ketedı. Qazaq-qyrǧyz arasynda bolǧan qaqtyǧysta Şyŋqoja qorşauda qalyp, öz barmaǧyn qylyşpen şauyp orap, sau qalǧan batyrlarǧa qazaq jerınde kömuge amanat retınde tapsyrǧan, özı sol "Jaiyl qyrǧyny” dep atalǧan şaiqasta erlıkpen qaza tabady. Şyŋqojanyŋ denesı qai jerde jerlengenı belgısız, al barmaǧy osy Şynqoja auylynda Naryn özennıŋ boiyndaǧy töbege kömılgen.
Şynǧoja batyr eskertkışı Aiaköz audanynyŋ Şynǧoja auylynda, Almaty - Öskemen avtomobil joly boiynda ornalasqan. Şynǧoja auylynyŋ aty da – batyrdyŋ esımımen tıkelei bailanysty. Qazaqtyŋ has batyry Şyŋqoja Bazarqūlūlynyŋ eskertkışın saltanatty aşyluyna bailanysty Naryn auyldyq okrugınıŋ mädeniet üiınde «Şyŋqoja batyr jäne Aiagöz öŋırınıŋ ädebi- mädeni şejıresı» taqyrybynda konferensiia öttı. Aiagöz qalasynyŋ ippodromynda qazaq üiler tıgılıp, qūran baǧyştap (as berılıp), qazaqtyŋ ūlttyq oiyndary audaryspaq, teŋge alu, qyz quu, qazaq küresı, toǧyz qūmalaq jäne üş sanatta at jarysy, qūsbegılık, jamby atu oiyndary öttı.
