Halyqaralyq túrki akademııasynyń (TWESCO) bastamasymen, Mońǵolııadaǵy kóne túrkilerdiń «Shıveet ýlaan» ǵuryptyq kesheninde bastalǵan arheologııalyq qazba jumystary jalǵasyp jatyr. Bul jumys, Mońǵolııa Ulttyq Ǵylym akademııasy janyndaǵy Tarıh jáne arheologııa ınstıtýtymen birigip júzege asyrylýda.
TWESCO basshysy Darhan Qydyráliniń jetekshiligindegi joba aıasynda, maýsym aıynda bastalǵan qazba jumystaryn tanymal mońǵol arheology D.evendorj jáne qazaqstandyq ǵalym-túrkitanýshy N.Bázilhan júrgizýde. Qazir keshenniń basty alańyndaǵy «Máńgi tas» tas eskertkishiniń ornyna jáne onyń eki tabaldyryǵyna qazba jumystary júrgizildi. Arheologtardyń jumysy nátıjesiz emes. Atap aıtqanda, ejelgi túrkilerdiń tas músinderin tapty. Budan bólek, úıindi tastardan arshylǵan keshenniń qurylymy, irgetasy, irgetasynyń pishini men kólemi anyqtaldy.
Osy jáne ózge de jańalyqtar Akademııanyń uıymdastyrýymen 24 tamyz kúni «Shıveet ýlaan» ǵuryptyq kesheninde ótetin «Uly dala kóshpelileri: tarıhı-mádenı úndestikter» atty II túrki-mońǵol arheologtarynyń dala semınarynda keńirek tanystyrylatyn bolady. Bul dala semınary Ázerbaıjan, Qazaqstan, Qyrǵyzstan, Mońǵolııa, Reseı jáne Túrkııa ǵalymdary men baspasóz ókilderiniń qatysýymen 2016 jylǵy 20-27 tamyzda ótetin «Táńirtaýdan Ótúkenge deıin: Uly dala kóshpendileriniń tarıhı-mádenı qazynalary» atty halyqaralyq ekspedıııa aıasynda uıymdastyrylady.
