Nur Otan komissiiasy koronavirus infeksiiasyn jūqtyrǧan qyzmetker Tolqynai Ordabaeva jūmys ısteitın Jambyl oblysyndaǧy audandyq auruhanada zaŋbūzuşylyq baryn anyqtady, - dep habarlaidy Tengrinews.kz partiianyŋ baspasöz qyzmetıne sılteme jasap.
Äleumettık jelıde jariialanǧan ündeuden keiın kelesı aqparat anyqtaldy. İnfeksionist-därıger Tolqynai Ordabaeva jeke paraqşasynda Jambyl oblysy Merke audanyndaǧy auruhanada basşylyq tarapynan zaŋbūzuşylyq bolǧanyn jazǧan.
Eske salaiyq, keşe Merkedegı ortalyq audandyq auruhanada infeksionist bolyp jūmys ıstep jürgen Tolqynai Ordabaeva auruhanadaǧy jaǧdaidy Facebook jelısındegı paraqşasynda jazǧan. Ordabaevanyŋ aituynşa, ol virusty karantinde nauqastardy emdep jürgende jūqtyrǧan. Därıgerdıŋ aituynşa, olarǧa maska da berılmegen. Maskany özderıne tıguge tura kelgen.
"Nauqastarmen bailanysta bolǧandardy 14-şı künı tekseru mümkın bolmady, sebebı Jambyl oblysynda ony tekseretın qūral joq. Sondytan olardy koronavirusqa soŋǧy baqylau saraptamasynan ötkıze almai, auruhanadan şyǧaruǧa tura keldı", - deidı därıger.
Qazırgı uaqytta ol virusqa qarsy "Aluviia" preparatyn qabyldap jatyr eken.
Sondai-aq, därıgerdıŋ aituynşa, Jambyl oblysynyŋ Densaulyq saqtau basqarmasy därıgerlerdıŋ koronavirus jūqtyrǧanyn jasyryp otyr.
"Jambyl oblysy Densaulyq saqtau basqarmasynyŋ maskaǧa,virusqa qarsy därı-därmeke, saraptamalarǧa bölgen aqşasy qaida? Nege koronavirusqa saraptama jasalmai jatyr? Jūmys ornynda nege epidemiologiialyq tergeu jürgızılmeidı?", - deidı därıger.
Ministr Eljan Bırtanov būl şaǧymǧa pıkır bıldırdı. Ol Tauarlar qauıpsızdıgı men sapa baqylau komitetınıŋ basşysy Liudmila Biurabekovaǧa osy mäselenı şeşudı tapsyrdy. Bırtanov būl jaǧdaidy jeke baqylauǧa alǧanyn aityp öttı.
