Aqtóbe oblysynyń 23 jastaǵy Álibı Ótepbergen atty jas akteri 9 aı boıy túrmede jazyqsyz otyrǵan kórinedi. Ata-anasynyń meıiriminen jastaı aırylǵan azamattyń isi týraly materıaldy tıisti organ basshylary nazaryna alady dep senemiz.
QR Joǵary sotynyń nazaryna!
Janashyr qoǵam nazaryna!
Ótepbergen Álibı – 23 jastaǵy jas akter. 2019 jyldyń shilde aıynda Aqtóbe qalalyq "Aqbóbek-Vostok" balalar lagerine jumysqa turǵan. 21 shilde kúni ony 7-shi otrıadtyń jetekshisi etip taǵaıyndaıdy. Jas jigit jumys barysynda birneshe jetkinshekti tártip buzǵandyǵy úshin jazalaıdy. Jaza retinde lagerde uıymdastyrylǵan bı keshine jibermeı qoıady. Onyń bul isine kek almaq bolǵan 7 synyp oqýshylary (ul balalar) ata-analaryna Álibıdi qaralap, kómek suraıdy. Olardyń sózerinshe, jetekshileri kún bermeı tıise bergen, óz jynys múshesin kórsetip, balalarmen jýyný bólmesine birge kirgen, jynys múshelerine qol tıgizgen. 25 shilde kúni otrıadtaǵy 7 balanyń ata-analarynyń aryzy boıynsha Álibı qamaýǵa alynyp, tergeý jumystary júrgizilgen. Tekserý nátıjesinde bilim bólimi mamandary: "Er bala balalarmen ortaq til tabysa almady",- degen qorytyndy shyǵardy. Sot zalynda Álibıdiń advokaty qorǵaýshysynyń kinásiz ekendigin 100 paıyz dáleldegen. Tipti, lager tóńiregindegi vıdeokameralardyń jazbalaryn da aıǵaq retinde kórsetip, lager basshysynyń ózi jetekshige arasha túsken. Barlyq bultartpas aıǵaqtarǵa qaramastan, sot kámelettik jasqa tolmaǵan jasóspirimderge qatysty is bolǵandyqtan bir jaqty ǵana qaralyp, Álibıge 10 jylǵa bas bostandyǵynan aıyrylý jazasyn taǵaıyndaǵan. Oǵan QR qylmystyq kodeksiniń 124 babynyń 3-shi tarmaǵy boıynsha aıypty dep tapqan.
Is tolyqtaı jabyldy. Onyń túrmede otyrǵanyna 9 aı boldy. Alaıda, baýyrynyń kinásiz ekendigin aıtyp, shyryldap júrgen jalǵyz janashyry ápkesiniń ótinishimen onyń dostary men áriptesterinen quralǵan @alibige_adildik toby isti qaıta ashyp, jas jigittiń aqıqatqa jetýine kómek kórsetýde. Elge tanymal tulǵalardyń barlyǵyna jekeleı jazyp, arasha suraýda. Tipti, tanymal advokattardan isti qolǵa alýyn surap kórgen. Búginde, Bıbigúl Dáýletbek, Gúlnaz Aýdanbaeva, Nurlan Naýryzálıev, Araı Jumashqyzy sekildi birneshe jýrnalıst tulǵalar kómektesip jatyr. Alaıda, kópshiligi áli únsiz. Olar ózderin kúndelikti belgilep, jeke jazyp, paraqshalaryn hatqa toltyrǵan jalǵyz is jaıynda bilmeıdi deısizderme? Joq! Bári biledi. Alibıdiń isinen biri qalmaı habardar! Áıtse de, qandaı qudiretti kúshtiń áserinen ekeni beımálim, áıteýir, biraýyzdan únsizdik saqtap otyr!
Alibıdiń janashyr dostary: "Álibıdiń óziniń taza ekendigin dáleldep shyǵýyna múmkindik bereıikshi. Tipti, qarǵa da qarǵanyń kózin shuqymaıdy degen bar ǵoı. Olaı bolsa, qarǵadan mıllıon ese sanaly bola tura, baýyrymyzdy qalaı qapasqa qııamyz? QAZAQ - jetimin jylatpaǵan halyq qoı. Sonda, ata-anasynyń meıiriminen jastaı aıyrylǵan bir jetimimizdi keń qulashymyzǵa syıǵyza almaǵanymyz ba? Biz nar tulǵaly Abaı men Shákárimniń urpaǵy emespiz be? Osy qara túnekti máńgilik jastanǵan HH ǵasyrdyń basyndaǵy urpaǵym dep ajal qushqan alyptarymyz az ba edi? Biz osonaý Uly dalada ádildikti ústem etip, qara qyldy qaq jarǵan Úsh bıdiń urpaǵy emespiz be? Jaýymyzdy bir aýyz sózben tize búktirgen ádildigimiz qaıda? Ǵasyrlar boıy babalarymyz armandaǵan táýelsizdik pen birligimiz qaıda? Qandasymyzdyń basyna is túsip, qos qanaty qaıyrylǵanda basymyz birikpese, qaı kezde birigedi? Onsyz da kórshiles Qytaı elinde jazyqsyz azap tartyp otyrǵan Aqjarqynnyń taǵdyryna jaýaptymyz! Eń bolmasa óz jerinde ádildikke jete almaı otyrǵan Alibıge joldas bolaıyqshy. Jas ǵumyrdyń obalyn moıynymyzǵa asyp alsaq, erteńgi kúni qaıtip jer basyp júremiz?! Tý kóterer jastarymyzdyń bárin árkimniń jalasyna qıyp, túrmege toǵyta bersek, erteńgi kúni el tizginin kim ustaıdy?", - dep zar ıleýde. Oılanaıyq.
QR Joǵary sotynyń osy máselege nazar aýdarýyn suraımyz.
Maıra Abdýllahatova,
Qaınar Akademııasy Jýrnalıstıka fakýltetiniń 1 kýrs stýdenti
https://www.instagram.com/p/B-6Zr4KFJRJ/?igshid=7sajos2t0tv8
