Qazaqstanda tötenşe jaǧdai kezınde tabysynan aiyrylǧan azamattarǧa Memlekettık äleumettık saqtandyru qorynan järdemaqy beru turaly şeşım qabyldandy. Osy oraida, äleumettık kömekke qol jetkızgen azamattar memlekettık qoldauǧa qatysty öz oilaryn bıldırdı.
Kökşetau qalasynyŋ tūrǧyny Qadyr Qasymjanov 61 jasta. Ūl men qyz tärbielep otyrǧan ardaqty äke. Qūrylys salasyna bar ǧūmyryn arnaǧan aqsaqaldyŋ üide jūmyssyz otyrǧanyna 1 jyldyŋ kölemı bolǧan.
Bız siiaqty jūmyssyz otyrǧan egde adamdarǧa ükımettıŋ berıp jatqan järdemaqysy kışkentai bolsa da, kömek bolyp tūr. Osydan bır jyl būryn küzette qyzmet atqardym. Qazır üide jūmyssyz otyrmyn. Jasyma bailanysty köp mekeme jūmysqa alǧysy kelmeidı. "Ükımetten jūmyssyzdarǧa osyndai kömek berıp jatyr" degendı estıgen boida 3 säuır künı bankke baryp, ötınım toltyrdym. Mıne, bügın 42 500 teŋgenı alyp otyrmyn. Öte quanyştyn. Osyndai bız siiaqty jūmyssyz adamdarǧa ükımet tarapynan kömek körsetılıp otyrǧanyna rizamyn. Prezidentımızge alǧysymdy bıldıremın, - dedı Qadyr Qasymjanov.
42 500 teŋge kölemındegı järdemaqy alǧandardyŋ qatarynda Petropavl qalasynyŋ tūrǧyny Balhiia Janybekova da bar. 24 jastaǧy jas ana bala kütımıne bailanysty üide otyr. Būryn-soŋdy eşqandai jūmys ornynda tırkelmegen.
Tötenşe jaǧdai kezınde jūmyssyzdarǧa berılıp jatqan kömektı aluǧa qarsy bolmadym. Ärine, bız siiaqty jas otbasyǧa mūndai kömek köptık etpeidı. Joldasym qūqyqqorǧau organdarynda qyzmet atqarady. Ol - otbasymyzdyŋ jalǧyz asyrauşysy. Bızdıŋ 1 jasar qyzymyz bar. Qazır osy bala kütımıne bailanysty üide otyrmyn. Öte rizamyn. Ötınımdı toltyrǧannan keiın bır jūmanyŋ ışınde aqşa tüstı. Jūmyssyz otyrǧan ärbır janǧa osyndai aqşalai qoldau kerek dep oilaimyn, - dedı jas ana.
Jeke käsıpker Aqnūr Jambylova da järdemaqy alǧandardyŋ qatarynda. Onyŋ aituynşa, ol eşqaida ötınım jıbermegen.
Basynda ötınım beruge ūialǧanym ras. Sebebı menen de mūqtaj jandar köp dep oiladym. Solardyŋ bıreuıne būiyrsyn dedım. Alaida, 10 säuır künı taŋerteŋ "42 500 teŋge taǧaiyndaldy" degen habarlama keldı. Taŋ qaldym. Söitsem, jeke käsıpkerlerge avtomatty türde järdemaqy tüsıp jatyr eken. Ärine, quandym. Kışkene bolsyn kömek. Joldasym ekeumızdıŋ tört balamyz bar. Joldasym tötenşe jaǧdai kezınde de jūmys ıstep jatyr. Men balalarmen üidemın. Sondyqtan järdemaqy bergen jandarǧa alǧys aitamyn, - dedı nūr-sūltandyq jeke käsıpker.
