Belgılı käsıpker Marǧūlan Seisembai Qazaqstandaǧy bırneşe elşılıkter men adam qūqyqtary jönındegı ūiymdarǧa hat jazdy. Sondai-aq, tünımen üiınıŋ janyn polisiia ökılderı toruyldap jürgenın, üiındegı kışkentai balalarynyn qorqytuǧa bolmaitynyn, eşqaida da qaşpaitynyn eskerttı.
"Dostar,
maǧan degen köŋılderıŋız ben alaŋdauşylyqtaryŋyzǧa raqmet!
Menı eş äreketsız qarap otyr dep oilap qalmaŋyzdar. Men de osy jaǧdaidy şeşu üşın qolymnan kelgen naqty zaŋǧa säikes äreketterdı jasap jatyrmyn. Bıraq, menı mäselenı «kelısıp şeşıp almaqşy» dep oilap qalmaŋyzdar. Bügın kelesı mekemelerge hat jazdym:
- AQŞ elşılıgı,
- Fransiia elşılıgı,
- Ūlybritaniia elşılıgı,
- Adam qūqyǧyn qorǧau boiynşa europalyq komissiia,
- BŪŪ adam qūqyqtary boiynşa basqarmasy,
- Qazaqstandaǧy adam qūqyqtary boiynşa biuro.
Öz hattarymda bolyp jatqan jaǧdaiǧa nazar audaryp, baqylauǧa aludy sūradym. Eger de menı tūtqynǧa alatyn bolsa, būl turaly barlyq halyqaralyq ūiymdardyŋ bıluın maqsat etıp otyrmyn.
Mūndai jaǧdaida qolyŋnan keletın özıŋe täueldı 99%-yn jasaisyŋ, al basty 1%-y Allanyŋ qolynda ekenın jaqsy bılesızder! Ärı qarai ne bolaryn tek bır Alla bıledı.
Jäne bır maŋyzdysy – būl men üşın küres emes, būl oryn aluy mümkın şekten şyǧuşylyqqa qarsy küres."
Būǧan deiıngı jazbasynda üiınınde kışkentai balalar bar ekenın, polisiia ökılderı telefonmen bırnärseler talqylap, qosymşa küş aldyrtqanyn jazǧan.
"Qaiyrly taŋ, dostar,
sızderdıŋ ötınışterıŋız boiynşa jaǧdaidyŋ bügıngı taŋdaǧy qalpyn baiandaiyn. Keşegı tün oŋai bolmady. Üi maŋynda qozǧalys köp boldy. Bır maşinalar üzdıksız keldı-kettı, bırdeŋe jasady. Jai närse emes ekenı anyq, älde men būryn baiqamaǧam ba mūny?
Ne bolǧanyn bılmeimın, qyzmetkerler rasiialarymen ärı-berı jügırıp, ūialy telefonmen bırnärse talqylap, qosymşa küş aldyrtty (qosymşa 4 maşina keldı). Keiın 12-ge taman barlyǧy saiabyrsydy. Kezek auysymy bolyp, bastyqtary tekserıp ketken bolar.
Qazır tünnen berı 5 maşina kezekşılıkte. Üige qarsy bettegı tauda bıreuler jür. Bırneşe ret olardyŋ linzalary jarq-jūrq ettı. Şamasy olar üiımdı üstınen baqylap otyrǧan bolar (snaiperler bola qoimas dep ümıttenemın).
Mıne, qazırgı jai osyndai.
P.S. Keşe Alnūr İliaşevtyŋ üiıne qalai basyp kırgenderı turaly oqydym. Barlyǧyn qatal türde jerge jatqyzǧan. Tıntu barysynda barlyǧy qasaqana laqtyrylǧan. Taǧy basqa da äreketter jasalǧan.
Osyǧan orai, şaǧyn ötınış jasaǧym keledı.
Qūrmettı qyzmetkerler, sızder menı oqyp otyrsyzdar, bılemın, öitkenı, kezekşılıktegı maşinadaǧylardyŋ barlyǧy smartfondarynda otyr. Eger (Alla betın ärmen qylsyn) sızderge būiryq tüsse, barlyǧyn tynyş küide jasaŋyzdarşy. Üide ekı kışkentai qyzym bar. Balalardy qorqytudyŋ qajetı joq. Sızderge eşkım qarsylyq körsetpeidı. Tynyş kırıp, özderıŋızdıŋ prosessualdyq ısterıŋızdı jürgızseŋızder bolady. Uaiymdamaŋyzdar, men eşqaida qaşyp ketpeimın."
Marǧūlan Seisembaidyŋ äleumettık jelıdegı jazbasynan
