42500 teŋgenı alǧandardyŋ qūpiiasy qandai?

Eŋbek jäne halyqty äleumettık qorǧau ministrınıŋ nazaryna!

Amerika tötenşe jaǧdai kezınde är adam basyna ai saiyn 600 dollarmen (258 600 teŋge) kömek körsetse, Qytai tabysynan aiyrylǧandardyŋ 100% jalaqysyn tölep otyrady eken. Jaŋa Zelandiianyŋ ükımetı karantinde otyrǧan azamattaryna  585  Jaŋa Zelandiialyq dollardy (151 585 teŋge) taǧaiyndasa, Daniiada memleket jūmysynan aiyrylǧandardyŋ 90% jalaqysyn öteitın körınedı. Al bızde 30 säuırden bastap 42500 teŋge ekınşı ret berılmek. «Naǧyz qarajattan qysylǧan azamattar memlekettık kömekten qūr qalyp, bır basynda bırneşe jūmysy barlar, bylaişa aitqanda «auzynan maiy aǧyp otyrǧandar» 42500 teŋgenı taǧy almaq» deidı TJ kezınde tabysynan aiyrylǧan Qazaqstan azamattary. Būnyŋ sebebı nede? Ükımettıŋ jüiesınıŋ qatelıgı me? Älde būqaranyŋ sauatsyzdyǧy ma? Köpşılıktıŋ äleumettık kömekten qaǧylu sebepterı qandai? Osy mäselelerdı anyqtap köru maqsatynda 42500 teŋgege naǧyz mūqtaj jandardan «Adyrna» ūlttyq portaly sūhbat alǧan edı. Atalǧan mäselenı eŋbek ministrı Bırjan Nūrymbetov nazarǧa alady degen senımdemız.

3-toptaǧy mügedek Nūrjan Sydyqov: Men memlekettık kömek alu üşın BJT töledım. 3-toptaǧy mügedek bolǧandyqtan 42 500 teŋge alatynyma senımdı edım. Alaida maǧan «Memleketten mügedektıgıŋız üşın qarajat alatyndyqtan ötınımıŋız bastartyldy» degen habarlama keldı. Mügedektıgım üşın nebärı 33 000 teŋge ǧana alamyn. Onyŋ özı jaldamaly päterımnen aspaidy. Ne azyq-tülık beretın qosymşa kömekterde de körsetılmeidı. Asyrauşysynan aiyrylǧan Toguzbaeva Elvira Erkebaevna: Jeltoqsan aiynda BJT tölegen bolatynmyn. TJ kezınde de BJT töledım. 7 säuır künı 42500.enbek.kz saityna ötınım berdım. 21 säuır künı "BJT tölemegensız" degen bas tartu haty keldı. Balamnyŋ äkesı bolmaǧandyqtan 26800 teŋge ükımetten kömek alamyn. Sonda men 26 800 teŋgemen qalai kün köremın? Ol menıŋ qai jyrtyǧymdy jamaidy? Tura menıŋ jaǧdaiymdaǧy 2 balasy bar kelınşekke de bastartu habarlamasy keldı. Būl nedegen sūmdyq? TJ-nyŋ asyrauşysynan aiyrylǧandarǧa qatysy joq pa? Balalarymyz tamaq jemei me? Soŋǧy tiynyma jaryq pen gazdyŋ aqşasyn töledım. Endı qu basymdy qaida soǧarymdy bılmeimın... Zeinetker Balkenje Nūrjanova: "Eŋ tömengı zeinetaqy alatyndarǧa 42500 taǧaiyndalady" degen edı. Bıraq maǧan "zeinerkersız" degen ötınımdı bastartu habarlamasy keldı. 23 000 zeinetaqym nege jetedı? Jalǧyzbasty ana Mamaseitova Raia Bekmuratovna: Maǧan «42500 teŋge beruden bastartyldy» degen habarlama keldı. Jalǧyzbasty analarǧa memlekettıŋ kömek körsetpeitınıne qairanmyn. Jūmys ıstep, tolyqqandai jalaqy alyp otyrǧandarǧa da 42500 teŋge tüsıp jatyr. Menımen bırdei asyrauşysy joqqa da aqşa audaryluda. Ükımet nege bärıne bırdei qaramaidy? JK-sy jabylsa da 42500 ala almaǧan Gülmira Mametova: 42500 teŋgenı maǧan da bermedı. 5 jyl būryn jabylǧan jeke käsıpkerlıgımdı syltau etıp tūr. Aitarǧa sözım joq. Iаndeks takside taksi jürgızuşısı bolyp jūmys ıstep, näpäqamdy tauyp jür edım. TJ engızılgennen berı aqşasyz qaldym. Ary qarai qalai ömır süretınımdı bılmeimın... Şaifolda Dameş: Menıŋ joldasym qaitys bolǧan, jalǧyz balam armiiaǧa ketken. Ükımetten eşbır kömek almaimyn. Sondyqtan 42500 teŋgege ötınım jıberdım. «12 aidyŋ ışınde BJT tölengen boluy kerek» degen hat keldı. Alaida men Kaspii Goldty sol üşın aşyp, BJT tölegen edım. Qaita-qaita ötınım tastasam da solai dep tūr. Jalǧyzbasty analarǧa ükımet nege kömek bermeidı osy? Saltanat Jalǧas: Küieuım Egen Sūltanhan qūrylysta jūmys jasaityn edı. TJ engızılgennen berı jūmysy müldem toqtap qaldy. Sodan ötınış tastap kördık. 11 säuırde «42 500 teŋge tüsedı, ötınımıŋız qūptaldy» degen habarlama kelgen bolatyn. Alaida sodan berı tūp-tura 14 kün öttı, aqşa älı tüspedı. Män-jaidy anyqtau maqsatynda 1414-ke qoŋyrau şalyp edım, jarty saǧattan keiın telefondy alyp, «bankke habarlasyŋyz» dedı. Bank «bızge aqşa audarylmady, audarylsa jıberetın edık» deidı. Sodan 1414-ke taǧy habarlastym. «1411-men bailanysyŋyz» dep sıltedı. Al ol nömır ıstemeidı, «qate terdıŋız» dep tūr.  

Aqgül AIDARBEKOVA,

"Adyrna" ūlttyq portaly