Memleket basshysy Qasym-Jomart Toqaev Ózbekstan Respýblıkasynyń prezıdenti Shavkat Mırzıeevpen telefon arqyly sóılesti, - dep habarlaıdy adyrna.kz Aqorda saıtyna silteme jasap.
Áńgimelesý barysynda Qazaqstan Prezıdenti Syrdarııa oblysyndaǵy Sardoba sý qoımasy bógetiniń buzylý saldaryn joıý jónindegi Ózbekstannyń qolǵa alǵan is-qımyldaryn joǵary baǵalap, baýyrlas ári tatý kórshi ózbek halqyna kómek kórsetýge daıyn ekenin jetkizdi.
Shavkat Mırzııoev Qasym-Jomart Toqaevqa qoldaý bildirgeni úshin alǵys aıtyp, atalǵan apat Qazaqstannyń ońtústigindegi birqatar eldi mekenge de zııan tıgizgenine ókinish bildirdi. Osyǵan oraı Ózbekstan Prezıdenti sý tasqynynan zardap shekken aýdandardy tezirek qaıta qalpyna keltirý maqsatynda birlesken sharalar qabyldaýǵa nıetti ekenin aıtty.
Memleketter basshylary qalyptasqan jaǵdaıǵa oraı týyndaǵan barlyq máseleni shuǵyl sheshý úshin eki eldiń Úkimetteri deńgeıindegi úılesimdi jumystyń mańyzdylyǵyn atap ótti. Sonymen qatar taraptar COVID-19 vırýsyna qarsy kúreste eki eldiń atqaryp jatqan tıimdi ári júıeli jumystaryna kóńilderi tolatynyn aıtyp, sonyń arqasynda indettiń keń taralýyna jol berilmegenine toqtaldy.
Osy rette taraptar pandemııanyń Qazaqstan men Ózbekstan arasyndaǵy saýda-ekonomıkalyq qatynastarǵa keri áserin boldyrmaý maqsatynda ekijaqty yqpaldastyqty jandandyrý qajettigine nazar aýdardy. Atap aıtqanda aýyl sharýashylyǵy, mashına jasaý, jeńil ónerkásip jáne taǵy basqa salalardaǵy eksport áleýetin arttyrý úshin birlesken óndiris oryndaryn ashý týraly ýaǵdalastyqqa qol jetkizildi.
Qazaqstan tarapynyń bastamasymen bolǵan áńgimelesý jyly jáne dostyq ráýishte ótti.
Keshe Maqtaaral aýdanynyń eki aýylyn sý basqanyn, al búgin sý tasqynynyń atalǵan aýdandaǵy Órgebas eldimekenine jetkenin habarlaǵan bolatynbyz.
