Ýkraınanyń burynǵy prezıdenti Vıktor Ianýkovıch eki aıǵa qamaýǵa alyndy (syrttaı). Kıevtiń Pecherskıı aýdandyq soty 4 mamyrda prokýratýranyń usynysyn qanaǵattandyryp, osyndaı sheshim qabyldady. Ianýkovıchtiń advokaty Vıtalıı Serdıýk sot qaýlysyna shaǵym túsiretinin málimdedi.
ÝNIAN agenttigi osy ispen shuǵyldanatyn prokýror Aleksandr Sýprýnǵa silteı otyryp "qamaýǵa alý týraly sheshim bılikti ozbyrlyqpen basyp alý týraly qylmystyq isti tergeý barysynda shyqqan" dep habarlaıdy.
Prokýrordyń málimdeýine qaraǵanda, aıyptaý taraby Ianýkovıchtiń Reseı aýmaǵynda tyǵylyp júrgenin rastaǵan.
Pecherskıı sotynda Ianýkovıchti qamaýǵa alý sharasyna qatysy bar taǵy bir is qaralady, ol - 2014 jylǵy 18-20 aqpandaǵy oqıǵalar. Bul kúnderi Kıevte Eýromaıdan bastalǵaly polıııa men bılikke narazylar arasynda eń iri qaqtyǵystar boldy. Oqıǵa barysynda prezıdent Ianýkovıch Ýkraınadan qashyp, Kıevte bılik aýysty. Kóp uzamaı Reseı Qyrymdy anneksııalady, Ýkraınanyń ońtústik-shyǵysynda qarýly qaqtyǵys bastaldy. NATO-nyń resmı anyqtamasy boıynsha, bul qaqtyǵysta Reseı agressor retinde kórinedi. Reseı Ýkraınanyń ońtústik-shyǵysyndaǵy konflıktige "qatysymyz joq" dep sanaıdy.
www.azattyq.org
