QÝANDYQ SHAMAHAIULY: Qazaq qoǵamy eshkimge senbese, bárine kúmánmen qarasa, qalaı jańarmaq?

09.05.2020

3594

Saıası partııa quramyn degen jigitterge nege ekenin bilmeımin, jurt kúle qaraıtyn, mazaq etetin bolypty. Táýelsizdiktiń 30 jylynda qazaq qoǵamynda jóni túzý saıası kúsh qalyptaspady. 2001 jyly bas kótergen demokratııalyq qozǵalys ishten iritildi, bólshekteldi, qýǵyndaldy, bas biriktirip úlgermeı toz-tozy shyqty. Keıin resmı bıliktiń arnaıy batasyn alǵandardyń joǵarydan qurylǵan bir ǵana partııasy "balalap", qazir sóz júzinde ǵana birli jarym "saıası kúsh" bolyp, Parlamentte otyr. Onyń ózinde bári sol bir ǵana "nurlanǵan álemniń" aýzyna qarap, "láppaılaýdan" ózge tyndyrarlary shamaly. Parlamenttiń eki palatasy da qazir óz mıssııasyn laıyqty atqaryp otyrǵan joq. Baıaǵy sovet zamanyndaǵy "halyq keńesiniń" arjaq, berjaǵy. Atqarýshy bılik ákelip usynǵan zań jobasyn sanaýly ǵana depýtat talqylaǵan túr kórsetedi. Bir-ekeýi synap ta tastaýy múmkin. Biraq, aqyr sońynda biraýyzdan 100 paıyz jaqtap bekite salady. Sonyń saldarynan dúmbilez zańdar qabyldala sala qoǵam narazylyǵyna ushyrap, oǵan qaıtadan tolyqtyrýlar men ózgeris engizýge májbúr bolady. Bılik ózi de "reforma kerek, jańaraıyq" dep aıtyp-aq jatady. Biraq, bári tek sóz júzinde ǵana. Parlamenttiń eki palatasynda da qabyldanǵan sheshimderge bári biraýyzdan daýys beretinderi sonshalyq, tipti qalys qalatyn tiri jan bolsaıshy. Ol da joq. Plıýralızmniń ózi turmaq onyń elesi de joq. Ol az bolǵandaı Prezıdent eki palatanyń biraz depýtatyn óz jarlyǵymen taǵaıyndap qoıady. Halyq saılamaǵan, joǵary bılik ózi taǵaıyndaǵan depýtatta qandaı bet-bedel bolady? Ondaı jerde demokratııanyń ıisi bolmasy bes jastaǵy balaǵa málim. Qazir halyq bıliktiń 3 taǵany ıaǵnı, basqarýshy, zań shyǵarýshy, sot bıligine senýden qalǵan. Tipti, beıresmı túrde "tórtinshi bılik" atalatyn BAQ-na senbeıdi. Ol az bolǵandaı qoǵamniń óz ishinen týyp shyqqan belsendi toptarǵa da, oppozıııalyq kúsh retinde attandap shyqqandarǵa da senýden qaldy. "Anaý da satqyn, mynaý da satqyn" - dep, árbirine kúdiktene qaraımyz. Kimdi jek kórsek, sony "bıliktiń jobasy" dep atap ala kózben atatyn boldyq. Qazaq qoǵamy eshkimge senbese, bárine kúmánmen qarasa, qalaı jańarmaq? Halyqtyń qamyn oılaıtyn, qoǵamnyń múddesine adal jandar bar shyǵar, bári kim kóringenniń qoljaýlyǵyna aınalyp, áldekimniń jobasyna aınalyp, satylyp ketpegen bolar, bir-birimizge senim artyp nege qoldamasqa. Álde, barsha qazaq Qosanov qusap syrt aılanyp ketedi dep kúmándaýmen kúnelte beremiz be?

Facebook - парақшамызға жазылыңыз!