Almatynyŋ bas sanitary Jandarbek Bekşin tötenşe jaǧdai rejimı aiaqtalǧannan keiın de karantin talaptaryn saqtau kerektıgın eskerttı. Jandarbek Bekşinnıŋ aituynşa, almatylyqtarǧa betperde kiıp, jeke basynyŋ qauıpsızdıgı men qauıptı ındettıŋ aldyn alu üşın dezinfeksiialyq jäne antiseptikalyq qūraldardy paidalanu kerek.
«Barlyq saqtyq şaralarynyŋ saqtalatynyn aitqym keledı. Tötenşe jaǧdai rejimı aiaqtalǧan künnıŋ özınde şekteu şaralary, sanitarlyq-epidemiologiialyq talaptar saqtalady. Menıŋ oiymşa, būl bızge älı de qajet. Öitkenı, koronavirustyq infeksiiany jūqtyru qaupı tolyq aiaqtalǧan joq», – dedı J.Bekşin.
Būl rette, qala tūrǧyndarynyŋ adamdar köp jinalatyn jerge barmaǧandary dūrys.
Dükenge, şaştaraz, kiım tazalaityn mekemelerge barǧanda äleumettık qaşyqtyqty saqtau kerek. Sondai-aq, qyzmetkerlerden qarapaiym gigiena erejelerın saqtau talap etıledı. J. Bekşin adamdar aldyn ala jazylu tärtıbın saqtap, jasandy kezek jasaudan aulaq boluǧa şaqyrdy.
«Barlyq dükender men käsıporyndar barlyq sanitarlyq-epidemiologiialyq normalardy saqtauy tiıs. Būl rette qaladaǧy barlyq jūmys beruşılerge aitarym bar. Olar öz qyzmetkerlerın käsıporynnyŋ nemese nysannyŋ menşık nysanyna qaramastan jeke qorǧau qūraldarymen qamtamasyz etuı qajet. Barlyq personal betperde, qolǧap jäne özınıŋ tehnologiialyq kiımınde boluy tiıs. Dükender men şaştarazdar qyzmetkerlerı mındettı türde betperde, bas kiımdı jäne firmalyq kiımnıŋ üstıne qolǧap kiıp jüruge tiıs. Barlyq üi-jailar ünemı jeldetılıp, al jūmys oryndary dezinfeksiialau qūraldarymen öŋdeluı tiıs», – dep atap öttı bas sanitarlyq därıger.
Ol sondai-aq, būl erejeler qūrylys nysandaryna da qatysty ekenın atap öttı. Qūrylysta barlyq jūmysşylar özderınıŋ tehnologiialyq kiımderın kiıp jürgenıne qaramastan, betperde kiiulerı mındettı.
11 mamyrda Almaty qalasynda karantin rejimı saqtalady. Perimetr boiynşa ornalasqan blok-beketterdıŋ jūmysy da jalǧasady. Būǧan deiın qabyldanǧan qalaǧa kıru men şyǧu erejelerı sol küiı saqtalady. Jūmysqa rūqsat alǧan käsıporyndar ǧana jıberıledı. Qoǧamdyq kölıktıŋ jūmys tärtıbı de özgerıssız qalady (saǧat 06.00-den keşkı 19.00-ge deiın).
Ūqsas jaŋalyqtar
