Petropavlda kárizdegi apatqa baılanysty tótenshe jaǵdaı engizilgeni habarlandy, - dep jazady "Adyrna" tilshisi Petropavlovsk.news basylymyna silteme jasap.
Petropavl ákimi Jýkov pen Nursultan Nazarbaev kósheleriniń aýdanyndaǵy káriz kollektorynda bolǵan apatqa baılanysty tótenshe jaǵdaı engizilgenin habarlady.
Kollektor 1956 jyly salynǵan dep habarlaıdy. Qurylystyń tozýy saldarynan apattar jıilep ketti. Kollektordyń tolyq toqtap qalýyna jol bermeý úshin bul aýmaqqa jedel jóndeý jumystaryn júrgizý qajet.
Qala ákimdigi kollektordy jedel jóndeý úshin jergilikti tehnogendik tótenshe jaǵdaı jarııalaý týraly sheshim qabyldady. Tıisti qujat qazir normatıvtik quqyqtyq aktiler portalynda qaralýda.
"Ázirge kollektor jumys istep tur. Tótenshe jaǵdaı aıasynda 700 metr káriz qubyryn tez arada jóndeımiz. "Qyzyljar sý" jumysyn bastady", - dedi ákimdik otyrysynda qala ákimi Serik Muhamedıev.
Tótenshe jaǵdaı 9 qarashada engiziledi dep habarlandy. Kollektor zerttelip, «Qyzyljar sý» JShS kúrdeli jóndeý jumystaryn bastap jatyr. Bul másele oblys, qala basshylyǵynyń baqylaýynda. Qala ákimdigi de alańdaýǵa negiz joq ekenin, jumys ádettegideı júrgiziletinin aıtty.
Jergilikti basylym atap ótkendeı, bul Petropavlda sońǵy bir aıdaǵy ekinshi iri káriz qubyrynyń jarylýy. 18 qazanda Abaı kóshesinde taǵy bir kollektorda iri apat boldy. Jóndeý jumystary jaqynda ǵana aıaqtaldy. Al jol júrýge ruqsat birneshe kún buryn ǵana ashylǵan bolatyn.
