Halyq belgili jýrnalıst Beısen Quranbekti sońǵy saparǵa shyǵaryp saldy. Qoshtasý rásimi Taldyqorǵandaǵy jýrnalıster úıinde ótti, dep habarlaıdy QazAqparat
Kórermenniń súıiktisine aınalyp, ár qazaqtyń júregine meıirim uıalata bilgen Beısen Abaıulyn sońǵy saparǵa shyǵaryp salýǵa halyq kóp jınaldy. Beısen Quranbektiń «Aıtýǵa ońaı», «Qareket» sııaqty jobalaryna mıllıondar razy bolsa, Jetisý jýrnalıster úıi sııaqty ózi muryndyq bolyp salynǵan kóp dúnıesi kópshilikke beımálim. Al, ómiriniń sońǵy alty jylynda basshy bolǵan «Jetisýda» Beısen Quranbek bir shoǵyr ini-qaryndasyna jol kórsetip ketti. Eldiń muńyn óz muńyndaı kórip, kópke qamqor bola bilgen júrekti azamat Beısen Quranbekti halqy shyn jaqsy kórdi. Ini-baýyrlaryn «batyr» dep erkeletetin arda tulǵamen el-jurt qımaı qoshtasty.
Beısen Abaıuly jaıly jyly estelikterimen bólisken tanymal jýrnalıst Nurtileý Imanǵalı áriptesterine beısentaný ǵylymyn qalyptastyrýdy usyndy. Ol osy arqyly qazaq jýrnalıstıkasy jańa deńgeıge kóteriledi dep sanaıdy. Onyń aıtýynsha, Beısen Quranbektiń ómirlik ustanymdary da - óskeleń urpaq úshin úlken ǵıbratty dúnıe. «Beısekeńdi qaıtara almaıtynymyzdy bilemin. Beısekeńdi umyttyrmaýdyń, este qaldyrýdyń bir-aq joly bar men biletin. Ol - beısentaný ǵylymy. Al beısentaný ǵylymynyń alǵashqy baspaldaqtaryn jasaıtyn kim degen kezde, ol - qalyń kórermen ekenine kúmán joq. Biraq sonyń negizin ustap otyrǵan - qalamgerler, meniń áriptesterim. Jańa mekteptiń qalyptasatynyna anyq kózim jetedi. Beısenniń mektebi - bólek mektep. Qosh bol, baýyrym, jatqan jeriń jaıly, topyraǵyń torqa bolsyn», - dedi Qazaqstanǵa eńbegi sińgen qaıratker, jýrnalıst Nurtileý Imanǵalı.
«2004 jyly Prezıdenttiń janynda birge jumys istedik. Sol kezde men Beısenniń eńbekqorlyǵyna tánti bolatynmyn. Ol ájesin Astanaǵa alyp keldi. Biraq úlken kisi elordany unatpaǵannan keıin ol shyǵarmashylyǵyn tastap, úıine qaıtty. Sol kezde «Beıseke, sizdiń bolashaǵyńyz keremet, sizdi Prezıdenttiń ózi jaqsy tanıdy, elordada qalsańyzshy» degenimde, kelispedi. «Apam ómir baqı janymda bolmaıdy. Al jumys tabylady» dedi. Beısenniń danalyǵyna men árkez tańqalatynmyn. Janyń jánnátta bolsyn, dosym», - dedi jýrnalıst Aleksandr Aksıýtı.
Beısen Abaıuly 49 jasqa qaraǵan shaǵynda ómirden ozdy. Marqum Taldyqorǵanǵa qarasty Erkin aýylynda jerlenedi.
