Äkımdık: Nūr-Sūltanda karantindık jeŋıldıkter bolmaidy

Nūr Sūltanda karantin rejimınen jeŋıldık bolmaidy. Būl turaly elorda äkımdıgınde aityldy, - dep habarlaidy "Adyrna". «Tūrǧyndar qataŋ sanitarlyq normalardy saqtau kerek. Qala boiynşa baqylau-ötkızu punktterı jūmysyn jalǧastyruda. Polisiianyŋ barlyq qūramy qalany küzetude, sanitarlyq normalardy saqtauǧa halyqty habardar etu üşın därıgerler, erıktıler ainalysuda», - delıngen baspasöz habarlamasynda. Elorda äkımı Altai Kölgınov koronavirustyq infeksiianyŋ taraluyna qarsy tūru jönınde keŋes ötkızdı. «Karantin rejimınıŋ qalpyna keluıne bailanysty qazır köşede adamdar köp. Kündelıktı reidter barysynda baiqaǧanymyz  halyq barlyq sanitarlyq normalardy ūstanbaidy: sanitarlyq-epidemiologiialyq talaptardy būzǧany üşın 26 obektı japtyq, 150 qūrylys kompaniialary, kafeler, meiramhanalar, qonaq üiler jäne t.b eskertu jasap, jartysyna aiyppūl salyndy». «Reidter kezınde adamdar saiabaqtarǧa, alaŋdarǧa köptep jinalyp, betperdesız jüretını baiqaldy. Mūnyŋ bärı virustyŋ asqynǧan türde taraluyna äkeluı mümkın. Därıgerlerge infeksiia közderın der kezınde anyqtau qiynǧa soǧady». «Osyǧan bailanysty polisiia qyzmetkerlerı qarqyndy rejimde jūmys ısteudı jalǧastyrady, tūrǧyndarmen tüsındıru jūmystaryn küşeitedı, kündelıktı qyzmetterı rūqsat etılgen kompaniialardyŋ jūmysyn baqylaidy. Nysandar sanitarlyq normalardy būzǧan jaǧdaida jabylady. İnfeksiia qaupı saqtalyp otyr, qazır demalatyn uaqyt emes» - dep atap öttı elorda äkımı Altai Kölgınov. Onyŋ aituynşa, «eŋ aldymen sız öz densaulyǧyŋyzǧa jauapty qarasaŋyz, jaqyndaryŋyzdyŋ densaulyǧyna da jauapty bolasyz». «Ökınışke orai, nauqastardyŋ 40 paiyzy 18-30 jas aralyǧyndaǧy jastar, 36 paiyzy 30-50 jas aralyǧyndaǧy adamdar. Sızge koronavirusty qalypty tūmau retınde qabyldap, emdeludıŋ qajetı joq. Būl auru bırneşe künnıŋ ışınde  tıptı eşqaşan auyrmaǧan adamnyŋ da densaulyǧyn būzuy mümkın.  Tek oqşaulanu jäne qataŋ sanitarlyq normalar ǧana sızdıŋ būrynǧy ömır süru qalpyŋyzǧa oralu üşın senımdı jäne jyldam ädıs», - dep tolyqtyrdy Kölgınov.