Medisina qyzmetkerı. Körnekı suret.
Aqtöbe oblysynda jedel pnevmoniia jūqtyrǧandar sany mausym aiynda alty ese köbeigen.
«Jaǧdai qiyndap ketkendıkten Aqtöbedegı 3 stasionar bazasynan pulmonologiia bölımın jasaqtap, kereuet sanyn 446-ǧa deiın köbeituge mäjbür boldyq» deidı oblystyq densaulyq saqtau basqarmasy basşysynyŋ mındetın atqaruşy Svetlana Esenamanova.
Densaulyq saqtau basqarmasynyŋ mälımetınşe, mausym aiy bastalǧaly 650 adamǧa jedel pnevmoniia diagnozy qoiylǧan.
Aqtöbe oblystyq densaulyq saqtau basqarmasy basşysynyŋ mındetın atqaruşy Svetlana Esenamanova (sol jaqta). Aqtöbe, 19 mausym 2020 jyl.
- Aqtöbede pnevmoniiany emdeitın därıger jetıspei jatyr. Ötken tünı 10 därıgerdıŋ jūmysyn 4 adam atqardy. Üş stasionardaǧy qiyn ahualdy körıp, jūmys ısteuden bas tartyp jatqan därıgerler de bar. Osyǧan orai emhanalardaǧy josparly jūmysty tolyǧymen toqtatyp, ondaǧy mamandardy pulmonologiia bölımderıne tartu turaly būiryq şyǧardym, - deidı Aqtöbe oblystyq densaulyq saqtau basqarmasy basşysynyŋ mındetın atqaruşy Svetlana Esenamanova.
Soŋǧy üş täulıkte Aqtöbe oblysynda jedel pnevmoniiadan 8 adam qaza bolǧan. 22 adam hal üstınde jatyr. Pnevmoniia jūqtyrǧandardyŋ arasynda medisina qyzmetkerlerı de köp. Jaǧdaiy kürt qiyndaǧan 16 nauqasty därıgerler jasandy tynys alu apparatyna qosuǧa mäjbür bolǧan.
Jedel pnevmoniiany emdeu üşın jasaqtalǧan üş stasionardyŋ bırı Aqtöbedegı temırjol auruhanasynda ornalasqan. Jūma künı tüs älpetınde auruhana janynda tuystarynyŋ halıne alaŋdap jylap-syqtap jürgender öte köp boldy. Tösek tartyp qalǧan tuysynyŋ jaǧdaiyn bıle almai jürgender äkımdıkke, densaulyq saqtau basqarmasyna habarlasu mümkın emesın aitady.
Azattyq tılşısıne sūqbat bergen qala tūrǧyny Erjan Oŋǧarbaidyŋ 67 jastaǧy äpkesı osydan üş kün būryn pnevmoniiadan qaitys bolǧan. Marqūmnyŋ 36 jastaǧy balasy da pulmonologiia bölımınde hal üstınde jatyr.
Pnevmoniiadan üş kün būryn äpkesı qaityp, endı hal üstınde jatqan jienınıŋ jaiyna alaŋdap jürgen Erjan Oŋǧarbai. Aqtöbe, 19 mausym 2020 jyl.
- Jienımnıŋ jaǧdaiy auyr. Därıgerlermen söileseiın desem, taŋ atqaly jauap beretın bır adamǧa jolyǧa almai tūrmyn. Jaǧdaiy menıŋ jienımnen görı täuırleu, söilei alatyn nauqastar därıger de, medbike de jetıspeidı deidı. Būlai bolmaidy ǧoi! Qinalyp jatqan adamdardy därıgerler emdeuı kerek emes pe? - deidı Erjan Oŋǧarbai.
Aqtöbe oblystyq densaulyq saqtau basqarmasynyŋ deregınşe, pnevmoniiamen auruhanaǧa tüsken pasientterden COVID-19 tabylmaǧan. Bıraq ekı aurudyŋ belgılerı öte ūqsas. Būryn-soŋdy mūndai jaǧdaimen kezdespegen därıgerler jappai pnevmoniianyŋ COVID-pen bailanysy bar-joǧyn aita almai otyr.
19 mausym küngı mälımet boiynşa, Aqtöbe oblysynda barlyǧy 853 adamnan koronavirus tabylǧan: 588 adamda auru belgılerı bar, 265 adamnan COVID-19 belgısı baiqalmaǧan. Resmi mälımet boiynşa, koronavirustan bır adam qaitys bolǧan. Būǧan deiın Aqtöbe oblysynda koronavirus jūqtyrǧan üş adamnyŋ qaitys bolǧany habarlanǧan. Bıraq keiınırek ölım-jıtımdı zertteu komissiiasy olardyŋ "koronavirustan qaitys bolmaǧanyn" aitqan.
"Azattyq" radiosy
