Prezident Qasym-Jomart Toqaevtyŋ «Ana tılı» aptalyǧyna bergen sūhbatyn mūqiiat oqyp şyqtym. Onyŋ ana tılın damytu jolynda osy basylymnyŋ qyzmetkerlerıne bergen joǧary baǧasymen kelısemın. Şynynda, būl gazet ömırge kelgen alǧaşqy künınen bastap tıl mäselesın köterıp, onyŋ mūŋyn halyqqa da, bilıkke de jetkızumen keledı. Sondyqtan Prezidenttıŋ gazet qyzmetkerlerınıŋ eŋbegıne jyly lebız bıldırgenı oryndy dep sanaimyn.
Prezident öz sözınde ana tılınıŋ Memlekettık märtebesı turaly özınıŋ oiyn aşyq aitty. Şynynda būl mäselede basqalardy elemei, syŋarjaq ketuge bolmaidy. Bızde qazır qazaq halqynyŋ ülesı köp bolǧanymen tılımızdıŋ yqpaly tömen ekenın moiyndauymyz kerek. Al attandap, orys tılınıŋ qazırgı märtebesın tömendetıp, qazaq tılın ǧana joǧary kötermek bolsaq, ol terıs tiımdılık beredı. Öitkenı, belsendı arenada jürgen qazaqtardyŋ köbı ana tılın jetık meŋgermegen. Onyŋ üstıne būl bızdegı separativtık piǧyldyŋ örısteuıne mūryndyq bolady. Sondyqtan, köp närsenı dabyraitpai, jüielı türde ıstegen dūrys.
Şynynda bızde qyzuqyndylyq pen ūrandatuşylyq basym. Al ondailarmen tabysty nätijelerge qol jetkızu qiyn. Bız aqyldy alystan ızdemei özımızben taǧdyry da, talqysy da köp halyqtardan aluymyz kerek. Sonyŋ ışınde äsırese, prezident aitqandai, özbekten üirenemız köp. Olardyŋ eptılıgı men ikemdılıgı qazırgı zamannyŋ sūranystaryna tolyq jauap beredı. Kezınde olarda da bilık oryndarynan orysşa söileu talap etıldı, olardyŋ da barlyq elitasy balalaryn orysşa oqytty. Alaida öz tılderın eşkımı ūmytqan joq, tıptı berık yntymaqtarynyŋ arqasynda özgelerdı özderıne ikemdep aldy.
Al bız özımızdı özımız kem tūtyp, basqalardyŋ soŋynan dalaqtap kettık. Sonyŋ salqynynan älı künge aryla almai kelemız. Adam barlyq kemıstıktı aldymen öz boiynan tauyp, aldymen özınıŋ, jaqynynyŋ boiyndaǧy sondailardy jeŋse – bärın de eŋseruge bolady. Men tıl janaşyrymyz, memlekettık tıldı qoldau kerek, qorǧau kerek dep aiǧailap jüretın talai qūrbymnyŋ balalary nemese nemerelerı tek qana orysşa söileitının körıp taŋ qalyp jüremın. Keibıreulerıne jūrtqa därıs aitpas būryn özıŋnıŋ otbasyŋdy tüzeseŋşı dep aityp ta qalamyn. Bıraq özderıne kelgende ondailar köŋıl audarmaidy da, özgelerdıŋ jat tılde söilegenıne yza bolyp jüretın qylyqtaryna taŋ qalasyŋ.
Men Prezidenttıŋ sūhbatyndaǧy myna pıkırlerge de qatty riza boldym. Mysaly, ol qazaq tılınıŋ qoǧamdaǧy qajettılın arttyru qajet dedı. Ol üşın memlekettık qyzmetke käsıbilıgımen qosa «qazaq tılın jaqsy bıletın azamattarǧa basymdyq beru kerek», dedı. Naǧyz bügıngı künnıŋ talaby osy. Sonymen bırge ol «qazaq tılın jaqsy bıletın özge ūlt ökılderın qoldauymyz kerek. Olardy Parlamentke, ökılettı organdarǧa sailap, memlekettık qyzmet jüiesındegı joǧary lauazymdarǧa taǧaiyndap, memlekettık nagradalarmen marapattap otyrǧanymyz dūrys», dedı. Būl da öte oryndy. Qazır özge ūlttyŋ jastary arasynda qazaq tılınde taza söileitınderın körgende qatty riza bolamyn. Mıne, solardy barynşa qoldau kerek.
Jalpy, Prezident Q.Toqaevtyŋ sūhbaty - halyqqa oi salatyn, salmaqty, tereŋ oily, jan-jaqty pıkırler. Ol sanaly adamdardy bei-jai qaldyrmasy anyq.
Säule MÄLIKOVA, Soltüstık Qazaqstan memlekettık arhivınıŋ direktory