Óresiz basshy «Ónerdiń» basyna «sý quıdy»

1167

Ákiminiń salaǵa sońǵy birneshe jyl boıy jetekshilik etken orynbasarynyń salǵyrttyǵynan ba eken, Ekibastuzdaǵy áleýmettik sala qazir qatty toqyrap tur. Sonyń ishinde mádenıet pen óner salasynyń toz-tozy shyǵyp turǵanyna kenshiler mekenindegi bas saraı – «Ónerdiń» «shatyry ketken» sharasyz keıpi kýá.

Biraz ýaqyttan beri «Óner» qalalyq mádenıet saraıyn Dıana Arystanova basqaryp otyr.  Dıana Musaqyzynyń mamandyǵy – bıshi. Joǵary bilim alyp qaryq qylmaǵan. Basshylyq qyzmettegi eńbek ótili anaý aıtqandaı mardymdy emes. Budan buryn laıyqty adam tabylmaǵan soń bir-eki jyldaı Ekibastuzdyń «Dostyq úıin» basqardy.

Jasyratyn eshteńesi joq, «Ónerge» de Dıana hanym kezdeısoq keldi. Iaǵnı, taǵy da laıyqty adam tabylmaǵan soń. Jáne Nefedova men mádenıet salasyn basqaratyn A.Jumabaevaǵa óz sózin lábbaılap tyńdaıtyn adam kerek bolǵan soń. «Laıyqty adam tabylmaǵan» degen tirkesti oılap taýyp otyrǵan biz emes, árıne. Osy salaǵa eńbegi sińgen talaı dúldúldi mensinbeı, basshylyq qyzmetke laıyq dep tappaǵan Nefedova (ákimniń burynǵy orynbasary) men mádenıet salasy basshysynyń talǵamynyń kórsetkishi bul.

Dıana hanymnyń deńgeıin jalpy «Ónerdiń» jyl boıǵy tym-tyrys qalpymen baǵalaýǵa bolady. Qazir, jaraıdy, karantın, biraq karantınge deıin de Dıana hanym tárbıelik máni zor shara ótkizip jarylqaǵan emes. Jarylqaýǵa óresi jetpeıdi de! Estýimizshe, ol burynǵy basshy Aıman Bralınanyń aıtqanymen júrip-turady-mys. Al Bralınanyń da «Ónerdiń» abyroıyn asqaqtatyp ketkeni shamaly.

Budan buryn birneshe jyl qatarynan «Ónerge» qazynadan qomaqty qarjy bólinip, syrtqy kelbeti, jertólesi, ishki bólmeleri bastan-aıaq jóndeýden ótkizilgen bolatyn. Mıllıondaǵan qarjynyń ıgiligin jurtshylyqtyń uzaq jyldar kóretinine senimdi edik. Biraq senimimizdi Arystanova hanym kúl-parsha qyldy. Mánisi mynada: bıyl taǵy da mádenıet saraıyn jóndeýge mıllıondaǵan qarjy bólindi. Bul joly shatyr jóndeý kezegi keldi. Jóndeý jumysyn moınyna alǵan merdiger shatyrdyń ústińgi qabatyn áı-sháı joq, túgel alyp tastapty. Merdiger men Dıana Arystanova aqyldasyp, qadaǵalap otyrýy tıis edi.

Ǵalamtorǵa qarap, aýa raıynyń yńǵaıyn bilip, sosyn «Shatyrdyń ústińgi qabatyn túgel almańyzdar, jaýyn-shashyn qaýpi bar, aldymen az ǵana bóligin bitirip, kezeń-kezeńimen jasańyzdar», - deýge bilim-biligi jetpegen ǵoı, týrasyn aıtqanda.  Osylaısha, «Ónerdiń» ishi sońǵy kúnderdegi qatty jaýyndarda túgelimen sýǵa ketken. Munyń sońy Arystanovanyń óziniń eden jýyp ketýine ulasqan. Deńgeıi sol bolǵan soń qaıtsin! Eden jýǵany jaı ǵoı, bıýdjettiń mıllıondaǵan qarjysyna jóndelgen qabyrǵalardyń, tóbeniń, tehnıkanyń búlingenin aıtsańyzshy! Óziniń aıybyn moıyndaý ornyna Arystanova ózgelerdi kinálap, qaramaǵyndaǵylardan túsinikteme talap etip, áriptesterin mezi etetindikten, nebir maıtalman mamannyń jumyspen qosh aıtysqan jaıy bar.

Áriptesteri «Ónerden» metall artqan júk kólikteriniń eshqandaı baqylaýsyz attanyp jatqanyna da narazy. Iaǵnı, ol jerden shyqqan buıymdy qadaǵalap, odan qansha aqsha tabýǵa bolatynyn ekshep jatqan eshkim joq!

Qolynan túk kelmeıtin ıkemsiz basshylar oıyna kelgenin istep, jelge shasha beretin bolsa, mundaı maqsatqa qarjy bólýdiń keregi ne? Odan da ol qarajatqa muqtajdarǵa baspana salyp berý áldeqaıda saýapty emes pe?!
Jaýynmen shaıylyp ketken qabyrǵalardy, búlingen dúnıeni endi kim ornyna keltiredi? Jelge ushqan qarjynyń suraýy kimnen?!

P.S. Aıtpaqshy, biraz ýaqyt buryn el aýzynda «áleýmettik saladaǵy birneshe basshy qosylyp tapqan-taıanǵan aqshasymen ózderine jetekshilik etken burynǵy basshynyń nesıesin jabady eken-mys» degen sóz jeldeı espesi bar ma! Bul sózdiń ótirik-shynyn jurt betine perishtedeı bolyp jymııa qaraǵan sol basshylardyń ar-ojdanyna, ata-babasynyń arýaǵyna tapsyrýdan basqa laj joq! Al endi naqty faktilerge súıensek, taıaýda «Ónerdiń» birer qyzmetkeri oblys ákiminiń saıtyna shaǵym hat jazdy. «Ónerdegi» óreskeldikter týraly. Biraq ol hat saıtqa jarııalanbaı, mysyqtyń «tezegindeı» jasyrýly kúıde Arystanovanyń óz qolyna qaıtyp kelipti. Ol hattan Ekibastuz qalasynyń ákimi Erjan Imanzaıpov ta beıhabar sııaqty.

Ákim men onyń qazirgi orynbasary Marııam Malıkova osy maqaladan soń bul máseleniń mán-jaıyna jetip, aq-qarasyn ajyratady. Kezinde Alla Pýgacheva men Roza Rymbaevalardyń tabany tıgen qasıetti sahnany darynsyz basshydan arashalaıdy dep senemiz. «Ónerdiń» jańbyr sýynyń astynda qalýy – Arystanovanyń biz biletin bir «mınýsy» ǵana!

Alpamys Aıdarhan,

Ekibastuz

Pikirler
Redakııa tańdaýy