Şymkent qalasy äkımınıŋ bırınşı orynbasary Şyŋǧys Mūqan alǧaşqy jūmys künın aiaqtap, aldaǧy josparlarymen bölıstı. Facebook äleumettık jelısınde +77007007091 qyzmettık nömırın qaldyrǧan ol, asa maŋyzdy sūraqtardy tıkelei özıne jazuǧa bolatynyn eskerttı.
"Ardaqty aǧaiyn!
Bügın alǧaşqy jūmys künım aiaqtaldy. Qūttyqtaularyŋyzǧa raqmet.
Memlekettık qyzmetten tys jürıp te memleketke qyzmet etuge bolady. Osy oiǧa bekınıp, memqyzmetten qaşqaqtap jür edım.
Soŋǧy aida körgen ındet oiymdy bıraz özgerttı.
Şymkent qalasynyŋ äkımı Mūrat Äitenov ötken aptada ūsynys jasady. Bıraz söilestık. Būryn syrtynan ǧana tanuşy edım. Ūsynysqa taŋǧaldym. Oǧan oiyn aşyq aityp jürgen mennen görı, būrynnan tanityn, iaǧni senımdı adam qolaily emes pe dep oiladym. Bıraz söilesken soŋ Äitenov myrzanyŋ Şymkentke baryn salyp adal qyzmet etkısı keletının sezdım.
Endı ne ıstemekpın?
Bırınşıden, densaulaq saqtau salasy. Adam qolyn kesıp alsa, ol jerge su jinalyp, jara paida bolady. Sebebı adam aǧzasynyŋ jasuşalary jarany jazuǧa jinalady. Qazır sondai jaǧdai. Qalanyŋ bükıl küş-quaty jarany jazuǧa jūmyldyrylyp jatyr.
Ekınşıden, bılım salasy. Qarapaiym ata-ana retınde ötken oqu jylyn äupırımdep ötkerdık. Ata-analarǧa da, mūǧalımderge de oŋai bolǧan joq. Jaŋa oqu jyly da oŋai bolmaidy. Degenmen onlain mekteptıŋ sapasy tüspeuge tiıs.
Üşınşıden, kommunikasiia. Är ıstıŋ tabystylyǧy 55% kommunikasiiaǧa bailanysty. Köldeneŋ kommunikasiia eşqaşan qiyn bolǧan emes. Äŋgıme tık, iaǧni tömennen joǧaryǧa, joǧarydan tömenge jüretın kommunikasiia. Sondyqtan, bailanystyŋ dästürlı türıne qosa, özımnıŋ qyzmettık WhatsApp nömırıme (+77007007091) asa maŋyzdy sūraǧy bar adam tıkelei jazyp jıberıŋız.
Törtınşı, mädeniet. Kompaniialarda "korporativtık mädeniet" degen tüsınık bar. Ony qalyptastyruǧa ūzaq uaqyt kerek. Eger qalyptassa, ol kompaniiany kelıp-ketetın basşylar emes, mädeniet basqarady. Sondyqtan, mädeniet degende tek öner men muzykany meŋzep tūrǧanym joq. Sol siiaqty jaqsy qūndylyqtardan bastau alatyn şymkenttık mädeniettı ary qarai ornyqtyru.
Besınşı, bırlık. Qazaqstandaǧy äraluandyq (tıl, dın, etnos, märtebe, közqaras) alauyzdyqqa emes, auyzbırşılıkke sebep bolardai üilesım tabu. Bır tüstı gülden, türlı tüstı gülden jasalǧan gülşoǧy ädemı. Äraluandyq degen - bailyq, äsemdık, ädemılık. Qandai ölşem boiynşa äraluan bolsaq ta, maqsat bır bolsa, bırlık bolady. Ol maqsat, menıŋşe, Qazaqstannyŋ bolaşaǧy, elımızdı damyǧan memleketke ainaldyru.
Altynşy, jastar. Ne şyqsa da jastardan şyǧady. Jastarǧa jaŋa käsıp üiretıp, jıgerlendırıp, jaŋa örıster aşu. Jastardy quattandyru da basty basty mındetım bolmaq.
Jetınşı, qalanyŋ damuyna halyqty qatystyru (public engagement). Halyq äkımdık pen mäslihat qabyldaityn maŋyzdy şeşımderde özınıŋ qatysy baryn sezınuı tiıs. Ükımettık emes ūiymdar osy jūmysta bastamaşyldyq tanytqany jön. Tüptep kelgende qoǧamdyq ūiymdar memlekettık organdar atqaryp otyrǧan funksiianyŋ bırqataryn özderı atqaratyn jaǧdaiǧa jetuı tiıs.
Segızınşı, senım. Osy jūmystyŋ barlyǧyn atqaru üşın halyqtyŋ senımı qajet. Senımnıŋ formulasy ädıl şeşım men adal eŋbek. Senımge selkeu tüsıretın köp faktordyŋ bırı sybailas jemqorlyq. Būl da bır virus. Onymen är azamat koronaviruspen küreskendei küresse ǧana jeŋbek. Özım basqaratyn äleumettık sala qyzmetkerlerın taza jūmys ısteuge, bügınımızge emes, bolaşaǧymyzǧa qyzmet etuge şaqyramyn. Barlyq ärıptesterım qoldaidy dep oilaimyn.
Menıŋ aldymda tūrǧan mındettıŋ bırqatary osy," - dedı qala äkımınıŋ orynbasary.
"Adyrna" ūlttyq portaly
