Üşınşı megapoliste bılım salasy «QR bılım berudı jäne ǧylymdy damytudyŋ 2020-2025 jyldarǧa arnalǧan memlekettık baǧdarlamasy» aiasynda öŋırlık baǧdarlamamen jūmys jürgızude.
Şaharda bılım salasynyŋ aǧymdaǧy jaǧdaiyna taldau jürgızılıp, memlekettık baǧdarlamada belgılengen nysanaly indikatorlar men körsetkışterge qol jetkızu boiynşa ıs-şaralar jospary bekıtılgen.
Onlain tamyz keŋesınde baiandama jasaǧan Şymkent qalasynyŋ bılım basqarmasynyŋ basşysy J. Täjieva jaŋa oqu jylynda bırqatar bılım ordalary aşylatynyn mälımdedı.
Jaŋa oqu jylynan bastap Şymqalada halqymyzdyŋ ūly perzentı Abai Qūnanbaevtyŋ 175 jyldyǧyna orai «A. Qūnanbaev atyndaǧy daryndy balalarǧa arnalǧan mamandandyrylǧan gimnaziia mektebı» jūmysyn bastaidy.
Mınekei, bılım salasy qyzmetkerlerı osyndai quanyşqa kenelıp otyr. Daryndy balalarǧa arnalǧan mektep qalada orta bılım beru salasyn damytu, bılım sapasyn joǧarylatu maqsatynda aşylyp otyr.
Ūly aqynnyŋ esımın ielengen bılım ordasynan bılımdı, alǧyr azamattardyŋ köptep şyǧatynyna senım zor.
Şymkent qalasynyŋ Aqparattyq-kommunikasiialar ortalyǧy
