Qazaqstan Respublikasy Mädeniet jäne sport ministrlıgı Tıl saiasaty komitetı men Şaisūltan Şaiahmetov atyndaǧy «Tıl-Qazyna» ūlttyq ǧylymi-praktikalyq ortalyǧy Qazaqstan halqy tılderı künı merekesıne orai ūlt ūstazy Ahmet Baitūrsynūlyna arnalǧan «Taǧzym men taǧylym» onlain otyrysyn ötkızdı.
Memleket basşysy Qasym-Jomart Toqaev Qazaqstan halqyna arnaǧan «Jaŋa jaǧdaidaǧy Qazaqstan: ıs-qimyl kezeŋı» atty Joldauynda:«Qazaq qoǧamynda jaŋa qaǧidattar jäne jaŋa baǧdarlar saltanat qūruǧa tiıs. Ūlt ūstazy Ahmet Baitūrsynūly: «Bılımdı boluǧa oqu kerek. Bai boluǧa käsıp kerek. Küştı boluǧa bırlık kerek. Osy kerekterdıŋ jolynda jūmys ısteu kerek» deidı. Būl közqaras bügıngı künı öte maŋyzdy»,– dep atap körsetken bolatyn.
Şarada qūttyqtau söz alǧan Qazaqstan Respublikasy Mädeniet jäne sport vise-ministrı Nūrǧisa Mūratūly Däueşov ekı jyldan keiın tuǧanyna 150 jyl tolǧaly otyrǧan ūly tūlǧanyŋ esımın mäŋgı este qaldyru baǧytyndaǧy şaralar josparyna toqtalyp, onlain otyrysqa qatysuşylardy merekemen qūttyqtady.
Şara moderatory Tıl saiasaty komitetı töraǧasynyŋ orynbasary Ädılbek Küneshanūly Qabanyŋ aituynşa, Orfografikalyq jūmys toby on otyrysyn ötkızgen eken, būl öz kezegınde ülken talqylaularǧa ūlasyp otyrǧan. Onomastikalyq komissiianyŋ üş otyrysynda elımız boiynşa bes jüz atau özgertılgen, iaǧni, saiasattyŋ salqyny tigen köptegen köne ataular qalpyna keltırılıp, qazaq tarihy men mädenietıne qatysty tūlǧalardyŋ esımı berılgen. Sondai-aq, Qazaqstan Respublikasy Ükımetı janyndaǧy Respublikalyq terminologiialyq komissiiasynyŋ ekı otyrysy ötıp, är qaisysynda bes jüzden astam termin maqūldanǧan. Būl degenıŋız myŋnan astam jaŋa termin qoldanysqa enıp, tılımız sonşalyqty sözben baiydy degen söz.
Osyndai qajyrly qairatkerlıgı men eselı eŋbekterı üşın Qazaqstan Respublikasy Ükımetı janyndaǧy Respublikalyq terminologiialyq, onomastikalyq komissiiasy müşelerı, Qazaq tılı älıpbiın latyn grafikasyna köşıru jönındegı Ūlttyq komissiia janyndaǧy Orfografiialyq, Ädıstemelık, Terminologiialyq, Tehnikalyq süiemeldeu jönındegı jūmys toptarynyŋ müşelerı, oblystyq tılderdı oqytu ortalyqtarynyŋ basşylary Qazaqstan Respublikasy Mädeniet jäne sport ministrınıŋ Alǧyshatyna, Tıl saiasaty komitetı töraǧasynyŋ Qūrmet gramotasyna ie boldy.
«Ūlt ūstazynyŋ taǧylymy» taqyrybynda baiandama jasaǧan Ş.Şaiahmetov atyndaǧy «Tıl-Qazyna» ūlttyq ǧylymi-praktikalyq ortalyǧynyŋ atqaruşy direktory, ǧalym Erbol Erdembekūly Tıleşov kesek oiǧa toly kösemsözdıŋ tiegın aǧytty:
«Üş jyl boldy, Tılder merekesı qazaq ǧylymynyŋ atasy, ūlt ūstazy Ahmet Baitūrsynūlynyŋ tuǧan künıne tūraqtady. Būl öte maŋyzdy. Tarih arenasyna şyqqan kez kelgen halyq öz Täuelsızdıgı üşın küresedı. Qazaq tarihy da osyndai azattyq arpalysyna tūnyp tūr. Resei imperiiasy men qazaq halqynyŋ küşı teŋ emes edı. Jaratqan iemız sol almaǧaiyp kezeŋde halqymyzdyŋ köz jasyna ūly Abaidy ömırge äkeldı. Odan keiın halqyna qalqan, jauyna semser bolar Alaş azamattarynyŋ şoǧyry qazaq kögıne şyqty. Solardyŋ ışınde Ahmet Baitūrsynovty erekşe ataimyz».
Būdan keiın Ahmet Baitūrsynūly atyndaǧy Tıl bılımı institutynyŋ direktory Anar Mūratqyzy Fazyljanova, Ahmet Baitūrsynūly muzei-üiınıŋ direktory Raihan Sahybekqyzy İmahanbet, Torǧaidaǧy mūrajailar keşenınıŋ basşysy Gülbanu Qūletqyzy Särsekeiler Ahmet Baitūrsynūly turaly oilaryn ortaǧa salyp, qūttyqtau joldady.
Şarany vise-ministr N.Däueşev qorytyndylady.
