4 qyrküiekte Almatyda ziialy qauym ökılderımen jiyn ötkızgen QR Memlekettık hatşysy Qyrymbek Köşerbaev Bılım jäne ǧylym ministrlıgı orta mektepterde otbasy qūndylyqtary men ūlttyq tärbiege baǧyttalǧan arnaiy pän engızu kerektıgın aitqan edı. «Adyrna» tılşısı atalǧan pändı engızuge qatysty mūǧalımderden saualnama aldy.
«Adyrna»: Sız qalai oilaisyz, osyndai pän kerek pe? Ol pändı oqytudyŋ qajettılıgı nede? Eger būl pän engızılse, kım oqytady?
Arai ERMEKQYZY DADANBEKOVA, mūǧalım:
-Otbasy qūndylyqtary jäne ūlttyq tärbiege bailanysty bölek pän engızudıŋ qajetı joq dep oilaimyn. Sebebı būl taqyryptar tärbie saǧattarynda qozǧalady. Mäselen, Nazarbaev ziiatkerlık mektepterınıŋ tärbie jūmysy osy baǧyttarda jūmys jasaidy. Tıptı būl mäseleler gumanitarlyq pänderge de kırıktırılgen (qazaq tılı, ädebiet, orys tılı, aǧylşyn tılı, tarih). Bölek pän aşqanymen ony ärine synyp jetekşıılerı jürgızedı.
Gülfairuz NŪRJANQYZY MYQTYBEKOVA, Almaty qalasyna qarasty Alatau audanynyŋ №182-şı jalpy bılım beretın mektebınıŋ mūǧalımı:
-Elımızdıŋ erteŋı, ärqaisymyzdyŋ ömır jalǧasymyz bolyp tabylatyn jas ūrpaqty ūlttyq qūndylyqtar negızınde tärbieleu - asa özektı taqyryp. Oquşylardyŋ boiynda ūlttyq qūndylyqtarǧa negızdelgen adamgerşılık tärbie men otbasy qūndylyqtaryn qalyptastyru mındetımız dep sanaimyn.
Ūlttyq qūndylyqtarymyz şyn baǧasyn alǧanda ǧana, joǧymyz tügendelıp, öşkenımız jana bermek.
Būl pän asa maŋyzdy pänge ainalary sözsız. Būl pändı qazaqtyŋ salt-dästür, ädet-ǧūrpynan mol maǧlūmat alǧan, qazaq ädebietı pänınıŋ mūǧalımı oqytady dep oilaimyn.
Gulnaz JANDAROVNA BEGAZOVA, M. Mametova atyndaǧy orta mektebınıŋ direktory:
-Qozǧap otyrǧan mäsele öte oryndy. Öitkenı bılım salasynda eŋbek etıp, bolaşaq ūrpaq tärbielep otyrǧan ūstazdyŋ otbasy qūndylyqtary men ūlttyq qūndylyqtarǧa nazar audarmauy mümkın emes. Qazırgı taŋda būl taqyryp öte auqymdy deŋgeide qozǧaluy kerek dep oilaimyn. Sebebı damuşy elderdıŋ qataryna qosyluǧa niettenıp jatqanda, ūrpaq sanasyna şeteldıŋ baǧytyn endırıp bara jatqandaimyz. Balany ünemı qadaǧalap otyru mümkın emes. Är ata-ana otbasynyŋ kielılıgın, babalarynyŋ erlıgın, aǧaiyn-tuystyq pen bauyrmaldyq sekıldı qūndylyqtardy balalaryna aityp otyru kerek. Qazırgı jas buynǧa osy atalǧan baǧyttaǧy äŋgıme örbıtseŋ, ekı-üş minut tyŋdap, aqyryn ornynan tūryp ketedı. Öitkenı ǧalamtor qyzyǧyna kırıp ketken.
Qazır kez-kelgen orta bılım ordalarynda ūlttyq tärbie jūmystarynyŋ naqty türde jospary bekıtılgen. Bıraq būl ūrpaq üşın az dep esepteimın. Sondyqtan arnaiy naqty pän retınde engızıluın qoldaimyn. Sonda ǧana bızdıŋ ūrpaq şeteldıŋ yqpalyna ermeidı.
Al endı būl pändı kım oqytu kerek degenge keleiık. Qazır mektepterde özın-özı tanu degen pän engızılgen. Būl pände adamnyŋ boiyndaǧy asyl qasietterın oqytady. Otbasy tärbiesıne de män beredı. Menıŋ oiymşa, jaŋa pänge özın-özı tanu pänınıŋ mūǧalımderı oqytuǧa laiyq.
Gülvira Asqarqyzy,
"Adyrna" ūlttyq portaly
