Qūdaiǧa şükır, elımızde sybailas jemqorlyq şaruaşylyǧy qarqyndy damyp keledı. Jemeitınder jer astynda degen ūranmen qarulanǧan, auyzdary alty qarys jemqorlar elımızdıŋ maqtanyşy.
Bız jemqorlarymyzmen maqtana alamyz. Olardy beker sottap jatyrmyz. Myqtylaryna Astana men Almatyda erekşeletıp eskertkış ornatuymyz kerek. Tıptı, keibırıne Şymkentten, ne Tarazdan nemese Astanadan köşe berse de jarasady.
Qūdaiǧa şükır deiık, jemqorlarymyz joq bolsa qaiter edık? Qūdai joqtan saqtasyn! Jemqorlarymyz bolmasa, qalai kedeilenıp keter edık? Bai men kedeidı ajyrata almaityn jaǧdaiǧa duşar bolar edık qoi? Masqara bolǧan degen sol bolar edı! Jemqor şeneunıkterımızden ainalaiyq! Olarǧa alǧys hat jariialap, qūrmettemesek, otyz eldıŋ qataryna qalai kıremız? Ekonomikamyz qalai damidy? Jemqorlyq - ındet dep jatady. Olardy olai qorlamau kerek! Jemqorlyq jasasyn, jemqorlyqty örkendetıp, qosymşa investisiialar tartu kerek. Şetel jemqorlaryn degendei. Tıptı, jemqorlar qoryn ūiymdastyrsaq? Arnaiy qordan jep otyratyn. «Atauyŋdy jegırler» dep qarǧai bermeu kerekpız. As... Jooq, jemqorlyq - adamnyŋ arqauy. Jaqynda ǧana qorǧanys ministrlıgınıŋ jetı lauazymdy şeneunıgı sottalyp, kösegemız kögerıp qaldy. Türlı-tüstı bolyp. Mūndai oqiǧa şetelde bolyp körıp pe? Tek bızdıŋ elde ǧana - osyndai! Mūny ülgı etuımız kerek! Jeteuıne jetı orden bersek te, taqiiamyzǧa tarlyq etpeidı. Türmege toǧytpai, qūdalyqtarǧa şaqyru kerek. Astylaryna - tai, auyzdaryna - pıste mai.
Sybailas jemqrlyqqa qarsy küres departamentterı deimız. Olar nege boz kılemge şyǧyp, kürese beredı? Mūndai sportty doǧaraiyq. Öitkenı, olar kürese, kürese şarşap, özderı de jegışter qataryna qosyldy.
Bügınde bılım salasyndaǧy jemqorlar jarqyrap körınıp keledı. Qūdaiǧa şükır. Jastarymyzdy osyndai jemqorlyqqa baulu üşın universitetterde «Jalmauyzdar» fakultetın aşyp, onda jemqor professorlar därıs berse, netken quanyş!
Qūrylys salasyndaǧy jemqorlyqty da damyta tüsu kerek. Tender degen jeŋder degen qaǧidanyŋ salalaryn damyta bersek, üilerımız qūlap, adamdar sūlap, baqytty ömır sürer edık. Paraqorlyqty demokratiialandyrsaq qaitedı? Nege jasyryn beredı, jasyryn alady? Arnaiy paraqorlyq düŋgırşekterın nege ūiymdastyrmasqa? Nemese, parqorlar kofe ışıp otyryp, beretıŋın berıp degendei... Kerek bolsa, para bergenın notarius arqyly zaŋdastyryp alu kerek qoi? Mysaly, bylai: «Men Qūlqynbaev Jegışbai, Bergışbai Alaǧanovtan jüz million teŋgenı para retınde alǧanymdy rastaimyn. Parany otbasymdy asyrai almaǧandyqtan, millionerler qataryna qosylu üşın alǧanmyn. Basqa böten maqsatqa alsam, auzyma alty jüz şybyn kırıp ketsın, tısımnıŋ arasynda et qalyp, şırıp ketsın!» degendei. Jasa, jemqorlyq, qūdaiǧa şükır, jemqorlyq päleket degenderıŋ jerge tükır!
Mūhtar Şerımnıŋ qyşqyl satirasy,
«Adyrna» ūlttyq portaly
Ūqsas jaŋalyqtar
